Máŋgasat leat juo guhká vuordán, ahte emeritusprofessor Pekka Sammallahti sámi-suoma-sátnegirjjis boađášii ođđa prentehus. Dál dat lea ollašuvvamin, go Davvi Girji lea buvttadeamen ođđa deaddileami dán nu gohčoduvvon ránes sátnegirjjis.
Lea lunddolaš, ahte giella rievdá dađistaga ja ođđa sániide leage dan dihte dárbu.
– Giella lea kultuvrra speajal, ja dainna sáhttá rievtti mielde govvidit olles kultuvrra. Danin dat sánit leat hui dehálaččat, čilge Sammallahti.
Sátnegirjji ráhkadeapmi leage guhkes proseassa. Áiggi lassin sátnegirjji čohkken gáibida, ahte ferte šaldut guovtti giela gaskkas vuohkkasit, vai jorgalusat leat áddehahttit, muitala Sammallahti.
Dán áigge lea goittotge álkit lasáhallat sániid duos dás, go dat gávdnojit dihtora fiillas.
Ollu ođđa sánit ja materiála
Ođđa prentehusa dárbbu mihttárin Pekka Sammallahti oaidná dan, go nu gohčoduvvon ránes sátnegirji nogai juo badjel 20 jagi áigi. Dan maŋŋá dat ii leat leamaš fidnemis, vaikko olbmot leat dan jámma jearahan.
Ođđa prentehusas leatge eambo sánit, go vuosttas sátnegirjjis.
– Ránes sátnegirjji ektui das leat sullii 20 000 sáni lasihuvvon ja geavahanovdamearkkat leat maid viehka olu eambo. Jus seamma hápmái prentejuvvošii go dát sátnegirji, de dat šattašii sullii golmma geardde ná assái. Das lea dan mađe ollu materiála eambo go ovdal, árvala Sammallahti.
Almmustuvvá juo dán jagi bealde
Ulbmil leage, ahte ođđa prentehus sátnegirjjis almmustahtto juo dán jagi, muitala Davvi Girjji oahpponeavvodoaimmaheaddji Seija Guttorm.
– Davvi Girji lea mearridan, ahte mii buvttadat Pekka Sammallahti sámi-suoma-sátnegirjji deaddiluvvon hámis ja dat almmuhuvvo dán jagi.
Davvi Girji almmuha sátnegirjji dan sivas, go dat lea girji, man olbmot vurdet ja háliidit. Seammás dat bálvala buot sápmelaččaid, geat háliidit geavahit sámi-suoma-sátnegirjji, go buohkat eai hálit geavahit dušše neahttasátnegirjjiid.
– Gal bábergirji lea vel ain dat, maid olbmot háliidit, dadjá Guttorm.
Maiddái Guttorm muitala, ahte ođđa prentehus viidu.
– Dat girji stuorru gal viehka ollu ja dasa leat dieđusge maiddái biddjon dat ođđaáiggi sánit dál lassin.
Guttorm árvala, go dál sátnegirjji giehtačálus lea gárvvis, de muhtin mánuid geažes dat livččii oažžunláhkai gávppiin.
Dán áššis oainnát lasi TV:s beaivvi Yle Ođđasat -sáddagis. Yle Ođđasiid Sámis sáhtát maid guldalit Yle Areenas.
