Gilbbesjávrri guovllus huksen lea lassánan ovdamearkka dihte davábealde luotta Hálddi guvlui. Ođđasamos lávvamearrádusat leat Gilbbesjávrri oppalašlávvaevttohusas. Gielda lea ožžon cealkámušaid áššái ovdamearkka dihte Sámemusea Siiddas ja Giehtaruohttasa bálgosis. Oktanaga oppalašlávain hábmejuvvo maiddái Davvi-Gilbbesjávrri sajádatlávva.
Guovllu badjeolbmot leat fuolas lassánan huksemis. Badjeolmmoš Nils-Máhtte Vasara lohká máŋgasa leat behtton huksemii. Boazodolliin lea oktasaš fuolla boahttevuođas.
Badjeolmmoš: "Veadjemeahttun dilli"
Badjeolmmoš Nils-Máhtte Vasara lohká, ahte ovdamearkka dihte skohtervuojašeaddjit leat hehtten boazodoalu. Olbmot guđđet verráhiid dávjá rabas.
– Dát lea veadjemeahttun dilli dáppe Gilbbesjávrrin, dat eai váldde vuhtii sápmelaččaid dáppe, oaivvilda badjeolmmoš Nils-Máhtte Vasara.
Vasara lohká, ahte siiddat, maid huksenplánat gusket, leat ovttastahttán fámuideaset ja áigot lágastit ášši nu guhkás go vejolaš. Giehtaruohttasabálgosa stivra lea várren láhkaáššiide 30 000 euro.
– Mii gal doalvut dan dál nu guhkás go vejolaš. Mun in boađe bisánit dainna ja meidnen váldit dan sámepolitihka garrasabbot ovdii dás ovddosguvlui.
Lávvaválbmemiin ságastallojuvvo gieldda ordnen álbmotdilálašvuođas vuossárgga čakčamánu 6. beaivve eahkedis Gilbbesjávrri giliviesus.
Lávas guovllut bistevaš orrumii ja turismii
Eanodaga gieldda mearreáigásaš eanangeavahaninšenevra **Kai Takkunen **dadjá, ahte sis lea diehtu ášši bohciidahttán dovdduin. Gielda lea maid ožžon ollu máhcahaga Gilbbesjávrri oppalašláva evttohusas. Lávvabargu lea ádjánan guhká ja árvalus bođes vel ođđasit oaidninláhkai.
– Mii iskat ordnet huksema dálá visttiid lahkosiidda gili guvlui. Dál orru, ahte dange eai áiggo dohkkehit, muitala Takkunen.
Takkunen mielas lea váttis váikkuhit lávvadoaimmaiguin ovdamearkka dihte lassánan vuojašeapmái dahje dasa, ahte áiddit guđđojuvvojit rabas. Dakkár váikkuhusaide leat goittotge čujuhan láva cuiggodettiin.
– Sáhttá goittotge iskat rávvet huksejeaddjiid. Dát áššit leat goittotge almmolaš áššit, maid galggašii muđuige áddet, Takkunen árvala.
Ođđa lávas leat viesso- ja bartasajit bistevaš orrumii ja luopmogeavahussii sihke guovllut mátkkoštanbálvalusaide. Davvi-Gilbbbesjávrri sajádatlávain ja Gilbbesjávrri oppalašlávain gielda viggá láhčit lasi saji ja guovlluid viesuid ja bálvalusaid huksemii.
Yle Ođđasiid Sámis ja Beaivvi ságaid sáhtát maid guldalit Yle Areenas.
