Rovastt Andrei Verikov alttad tuâjas Âʹvvel pappân påʹrǧǧmannu aalǥâst. Eʹčč Rauno Pietarinen pääcc jeältõʹǩǩe sueiʹnnmannu looppâst.
Verikov serdd ođđ tuâjjses Ooʹbbdneǩ-Lääʹddjânnam ortodookslaž seäʹbrrkååʹddest. Sääʹmjânnam lij ouddlest toobdâs suʹnne.
– Muu vuõpp da vueʹn lie Rauno da Anneli Pietarinen. Leäm jeällam täʹlvv- da ǩieʹssluõvâsvuõđin Sääʹmjânnmest. Toobdam siõmmna še pääiklaž ceerkvallaš toiʹmmjummuž.
Eʹčč Andrei Verikov ij võl leäkku snäätnai, juätkk-a son Âʹvvel pappân pueʹtti eeʹjj. Tuâjj kuuitâǥ ǩeäss suu miõl jiânnai.
– Oummu jieʹllem lij miâlggâd vuäʹniǩ da jõs haaʹlad vueiʹnned jeeʹres pääiʹǩid di vuäǯǯad ǩiõččlâsttmõõžžid, âlgg tääʹvted vuäittmõõžžid, tuâtt eʹčč Andrei.
Eʹčč Andrei Verikov haaʹlad mättʼted da še mättjed ođđ aaʹššid
Eʹčč Andrei Verikoov mieʹldd ij leäkku aivv hiâlpp juäʹtǩǩed eʹčč Rauno Pietarinen Sääʹmjânnmest tuejjeem tuâj, koon son âânn jõnn äärvast.
– Mon jiõm vueʹlj Sääʹmjânnma pâi mättʼted oummid, peʹce še mättjed ođđ aaʹššid seeʹst.
Mâʹte eʹčč Rauno, eʹčč Andrei še äuʹǩǩad sosiaalʼlaž media tuâjstes.
– Ǩeeʹrjtem ääiʹjab blogi-teeʹkstid da korona-ääiʹj mättõʹllem tuejjeed podcaastid, koin mušttlam ortodookslažvuõʹtte õhttneei aaʹšši pirr. Ääiǥam juäʹtǩǩed podcaasti tuejjummuž da neʹttmättʼtõõzz seämmanalla ku eʹčč Rauno.
Eʹčč Andrei piârrǥa koʹlle suu kaav da koumm päärna, ǩeäin puärrsummus lij juʹn siirdčõõttâm jiijjâs tallu. Piâr kuuitâǥ kuâđđai vuäʹmm dommvoudda.
– Muu kaappi tuâjj lij Lappeenranta-gåårdest da son ij ääiǥ vueʹlǧǧed tââvas. Muäna leäʹp kuuitâǥ suåppâm õõutmiõʹlle, što mon vuäitam vueʹlǧǧed Sääʹmjânnma, pååǥǥast eʹčč Andrei.
Sääʹmǩiõl määttaid eʹčč Andrei alttad tâʹlles čâhčča. Âsttääiʹjest son äigg naaudšed Sääʹmjânnam luâđast.
– Mon jiõm leäkku sniimmâm kuʹǩes ääiʹj sizz da leäm smiõttâm, što ååʹn leʹčči šiõǥǥ äiʹǧǧ altteed tõn staarjõõzz oʹđđest. Tuʹǩǩääm jååʹtted luâđast da sniimmâd, kovvad eʹčč Andrei Verikov.
Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.
