Artihkal lea 11 jagi boaris.
Sámediggelága bargojoavku oaččui lasseáiggi
Sámediggelága ođasmahttinbargojoavku lea bivdán ja ožžon lasseáiggi čakčamánu lohppii. Sivvan lea bargojoavkku ságadoalli Riitta-Leena Paunio mielde vátna áigi gieđahallat stuorra áššiid, mat leat beavddi alde.
Govva: Yle •
Sámediggelága ođasmahttinbargojoavku lea bivdán ja ožžon lasseáiggi čakčamánu lohppii, muitala bargojoavkku ságadoalli, vuoigatvuohtadiehtága lisensiáhta Riitta-Leena Paunio.
Bargojoavku ulbmilin lei álgoálggus guođđit evttohusas ođđa láhkan miessemánu loahpa rádjai.
- Sivvan lea vátna áigi. Máŋga stuorra ášši leat beavddi alde, Paunio dadjá.
Stuorra áššin Paunio namuha sápmelašmeroštallama, ráđđádallangeatnegasvuođa, sámedikki doaimmaid ja válggaide guoskki áššiid.
Eai gula šat áššedovdiid
Paunio dáhkida, ahte bargojoavku bastá čállit láhkaevttohusa čakčamánu loahpa rádjai.
Bargojoavku ii áiggo šat gullat áššedovdiid, muhto doallá vel Paunio mielde moadde čoahkkima.
