Sámi Duodji rs. mearridii gieskat heaittihit Eanodaga doaibmabáikki ruhtavátnivuođa dihte. Báikkiolmmoš šálloša, go fargga ii leat šat báiki, gos sápmelaččaid duojit oidnojit.
Elli-Saara Magga mielas lea váivi, go Eanodaga guovllus ii leat boahtte áiggis šat gávpi, gos oažžu duodjedárbašii oastit. Son ballá maid, ahte duojáriin ii leat šat báiki gos čájehit máhtuset.
- Gos mii čájehit dan, maid mii leat bargan ja buktit daid ovdan? Gosa bidjet min dáiddárat dujiid, liinniid ja gávttiid, vuoddagiid, maid leat gođđán ja gos sii vuvdet daid? Galgágo bidjat fas luoddagurrii dakkar unna butihkaid dego dološáigge, jearrá eanodahkalaš Elli-Saara Magga.
Suoma stuorimus sámi searvvis, Sámi Duojis leat máŋgačuohte lahtu. Doaimma ulbmil lea ovddidit sámekultuvrra ja duoji, fállat duodjái vuovdinkanálaid ja skuvlet. Searvvis leat vel dál doaibmabáikkit ja bargit Eanodagas ja Anáris.
Searvvi ságadoalli Jouni S. Laiti mielde hedjonan ruhtadili dihte fertejit giddet Eanodaga doaibmabáikki, go Heahtás eai leat gávdnan hálbbit lanjaid.
- Dieđus eat dárbbaš dinet, muhto galggašeimmet julggiid alde, ahte ii galgga maiddái leat rehketdoalus vuolláibáza. Diimmá rehketdoalus lei vuolláibáza, nu ahte eat mii sáhte dien giennu mannat máŋggaid jagiid mieldálágaid. Dien dáfus gal váikkuha ruhta, ákkastallá Laiti searvvi mearrádusa.
Sámi Duoji Heahtá doaibmabáiki lea anus vel geassemánus. Searvi áigu goittotge boahtte áiggis doaibmat goit juogaláhkai Eanodagas.
- Heahtá guovllus doaibmat dáhpáhusaid oktavuođas ja vejolaččat prošeavttaid bokte. Muhto mihkkige ii eastte álggahit dán doaimma ođđasit jus dakkár dilli boahtá ovdii, dadjá Laiti.
