Vuoigatvuohtaministtar Anna-Maja Henriksson lea báhcimin sámeáššiid ministtarjoavkkus okto bealuštit evttohuvvon sápmelašmeroštallama. Ná čuoččuheigga Johannes Koskinen ja Klemetti Näkkäläjärvi sotnabeaivve.
- Henrikssona málle lea vissa oalle lahka dan, maid sámediggi sávvá. Earáid oaidnun lea, ahte dat sáhtášii buktit ođđa váttisvuođaid, dadjá vuođđoláhkaváljagotti ságadoalli Johannes Koskinen sotnabeaivve Lapin Kansa -áviissas.
Sámeáššiid ministtarbargojovkui gullet Henriksson lassin Paavo Arhinmäki, Jari Koskinen, Ville Niinistö, Päivi Räsänen ja Erkki Tuomioja.
Lappalaščuokkis seaillošii muhtin hámis lágas
Sámedikki ságadoalli Klemetti Näkkäläjärvi dieđuid mielde dát oaivvildivčče, ahte nu gohčoduvvon lappalaščuokkis seaillošii muhtin hámis sápmelašmeroštallamis.
- Maŋimus jorggáldat sápmelačča meroštallamis lea dat, ahte sámiministtarbargojoavkkus, earret vuoigatvuohtaministara, livččii hállu bisuhit dálá eahpečielga dili. Dat evttohivččii meroštallamin smiehttamuša evttohusa ja dálá meroštallama nuppi čuoggá ovttastahttima. Dáláš lága nu gohčoduvvon duottar-, vuovde- ja guolásteaddjesápmelačča maŋisboahtti váldojuvvošii mielde meroštallamii, muhto eaktun maŋisboahttis livččii sámegiella eatnigiellanis, Näkkäläjärvi čilge.
"Sápmelaččaid dievaslaš suddadeapmi suopmelaččaide"
Näkkäläjärvi čállá bloggastis, ahte lappalaščuoggá sisttisdoalli sápmelašmeroštallama vuodjin sámediggeláhkii livččii iehčanas Suoma áigge stuorimus olmmošriekterihkkun.
- Jearaldagas livččii nappo sápmelaččaid dievaslaš assimilašuvdna suopmelaččaide.
