Lumi accessories -nammasaš suopmelaš designfitnodat lea geavahan márkanfievrrideamis fakesámegahpira, mii muittuha sámi almmáiolbmuid gahpira. Dát lea vuot bidjan johtui garra ságastallama sámekultuvrra ávkkástallamis vuot oktii ovdamearkka dihtii Twitteris.
Loga ovdamearkkaid Twitter-ságastallamis dán artihkkala loahpas.
Lumi accessories -fitnodaga beaivválaš jođiheaddji ja hápmejeaddji Sanna Kantola muitala, ahte fitnodat oažžu inspirašuvnnas eandalit suopmelaš eallinvuogis ja luonddus.
Lumi bálkkašuvvui jagis 2011 Suoma dehalamos mohtabálkkašumiin, man namma lea Kultainen vaatepuu.
Dán jagi márkanfievrrideamis mielde leahkki gahpir lea leamaš sis geavahusas ovdalge. Dál goit viidásit ođđa modeallačoakkáldaga govain. Govat leat juo deaddiluvvon hilduide ja bláđiide.
Teman juovllat, suopmelašvuohta ja Lappi
Máinnusteamis geavahuvvon gahpir lei ostojuvvon juo jagis 2013 mátkemuitogávppis Helssegis.
Dat, ahte gahpir ii leat albma sámegahpir, bođii ovdan gieskat.
– Eat jurddašan leago fake vai ii. Iešalddes dat, ahte dat gahpir lei fake, bođii gieskat dihtui, dadjá Kantola.
Kantola oaivvilda, ahte sápmelašvuohta lea oassi suopmelaš kultuvrras. Danin maiddái gahpir váldojuvvui atnui.
– Mis dat suopmelašvuohta ja suopmelaš kultuvrra sierra oasážat leat leamaš dehálaš oassin Lumi brändis, son muitala.
Jagis 2013 ostojuvvon gahpir váldojuvvui dán jagaš kataloga ja modeallačoakkáldaga govaide daningo teman leat juovllat, suopmelašvuohta ja Lappi.
“Oassi suopmelaš kultuvrras”
Kantola oaidná, ahte sápmelašvuohta lea okta oassi suopmelaš kultuvrras.
– Sápmelaččat leat dieđusge Suomas unnitlohku. Lappi ja sápmelaš unnitlohku leat oassi Suoma, čuoččuha son.
– Mii eat leat vuolgán earuhit sápmelaš kultuvrra suopmelaš kultuvrras, baicce jurddašit dálá Suoma hui máŋggakultuvrralaš riikan. Suopmelaš kultuvra sáhttá sisttisdoallat sápmelašvuođa, suomaruoŧŧelašvuođa ja hui máŋggá eará riikkavulošvuođa, oaidná Kantola.
Nissonis almmáiolbmo gahpir
Máinnusteamis geavahuvvon govas lea nissonolmmoš coggan almmáiolbmo gahpira.
Dat heive Kantola mielas bures sin fitnodaga brändii, vaikke ii gula sámekultuvrii.
– Mu mielas manná hirbmat bures min brändii dat, ahte nissonis lea almmáiolbmuid gahpir, mii leat goit unisex-brändi, lohká Kantola.
“Dál ášši lea čielggas”
Dál Lumi-fitnodahkii ášši lea goit šaddan čielggasin.
– In vuos kommentere, ahte maid mii bargat. Govat leat juo katalogas ja dat lea juo vuolgán máŋgga sadjái. Lea oalle maŋŋit dál bargat maidige goit dán kataloga oasil, dadjá Kantola.
Kantola muitala, ahte boahttevuođas sii eai sihkkarit geavat sápmelašvuođa iežaset buktagiid hápmemis.
– Dál go ášši lea nu čielggas, nu lea hui eahpejáhkkehahtti, ahte geavahivččiimet sámekultuvrra moge.
Sámekultuvrra ávkkástallan ságastahttán olu
Fake-sámebiktasiid geavaheamis ja sápmelašvuođa ávkkástallamis lea leamaš olu sáhka.
Ovdamearkka dihtii dán giđa áigge ságastallojuvvui Grind -dáiddafilmma birra, mas nisson lei coggan almmáiolbmo fakegávtti.
