Tave-Laapist láá suolluuh moonnâm iho siisâ maaŋgâ irâttâsân. Poolislájádâs totkee muštâl, ete suolluuh láá puáttám mäddiláá tavas. Vuosmuuh suolâvuođah tábáhtuvvii moonnâm oholoopâ ääigi.
– Poolis tiättun láá puáttám suolâvuođah Pellost, Kolarist já Iänuduvvâst. Ohtis láá iällám oovce pääihist, muštâl totkee Teuvo Alakunnas.
Hettast suáládii ruuđâ Cafe Siljast, Erämaakota Oy:st já Tunturilapin Leipä Oy:st. Suolluuh láá moonnâm siisâ puunnjâmáin jo-uv uuvsâ teikkâ laasâ.
– Tot oro lemin uáli táválâš já älkkees vyehi, mii kiävttoo ennuv, Alakunnas muštâl.
Poolis ij pyevti muštâliđ, ete mon ennuv láá kavnâm ruuđâ. Ruuđâ lasseen láá tuálvum meid ucánjáhháá tävirijd.
Tahheeh iä lah tiäđust – poolis käibid tiäđuid
Tääl iä vala tieđe ollágin, ete kii teikkâ kiäh láá suolâvuođâi tyehin.
– Puoh ääših já tutkâmmuulsâiävtuh láá vala ávusin ton iähtun, ete ep määti uuccâđ tiätu ulmuid teikâ autoid. Mihheen tiäđuid tahhein ij vala lah. Oro kuittâg, ete ko láá puáttám mäddin tavas, ete miinii tiäđuid lii ferttim leđe, ete kost taah irâttâsah láá, Alakunnas muštâl.
Jis ulmuin lii miinii tiäđuid omâs lappâdjottein teikkâ autoin eromâšávt ijjâääigi, te tast puáhtá almottiđ Kittâl poolis tutkâm numerân 0295 466 155.
