Anarâškielâ servi lii almostittám anarâškielân uđâsloostâ, mon nommâ lii Anarâš aavis. Uđâslostâ peividuvvoo aainâs-uv kulmii ohhoost já tom puáhtá luuhâđ tuše neetist.
Servi uusâi jo ive 2021 ruttâdem okkoloostâ almostittem várás, ruttâ ij talle puáttám. Ruttâdem lâi uáivildum taid nettilostáid, moh jo almostuveh ja ton lasseen siskáldâs kolgâččij tievâsmittiđ aainâs-uv kulmii ohhoost. Anarâš aavis váldutoimâtteijee Fabrizio Brecciaroli osko, ete sij uážžuh torjuu taan ive.
Aavisist almostiteh uđđâsijd moh kyeskih Säämi, Suomâ, Skandinavia, Euroop já ubâ maailm.
– Neetist iä lah sahâvuáruh, mutâ toh-uv láá puátimin muádi peeivi siste. Muáddi sahhiittâllâm já blogi, muštâl Brecciaroli.
Anarâškielâ servi almostit jo kuulmâ loostâ
Anarâškielâ servi almostit pävirhäämist Anarâš-loostâ, Loostâš-digiloostâ já tääl meid uđâsloostâ. Fabrizio Brecciaroli arvâl, ete eres sämikielâin Suomâst iä kavnuu siämmáá vijđes falâldâh loostâid.
– Muu mielâst iä lah kuássin liijkás ennuv teevstah já čalluuh anarâškielân, sun juurdâš.
Brecciaroli muštâl, ete puáris lostâtoimâ juátkoo ruttâdemčuolmâin huolâhánnáá.
– Čuolmâ lii tot, ete majemui iivij servi ij lah finnim ruttâdem lostâtooimâ várás, tuše sämitigge lii mieđettâm ruttâdem, muurâšt Brecciaroli.
Anarâškielâ servi fáálá tääl meid kielâpalvâlusâid, ovdâmerkkân jurgâlem já kielâtipšom.
Kuldâl maid anarâškielâ seervi medipargee já Anarâš aavis váldutoimâtteijee Fabrizio Brecciaroli muštâl uđâsloostâst.
Kuldâl lase anarâš saavâid tääbbin.
