Sámiid duohtavuođa- ja soabadankomišuvnna komissárat leat fuolas Deanuleagi olbmuid birgemis. Dat bođii ovdan maŋŋebárgga panelaságastallamis, mii ordnejuvvui Deanučázádaga vuoigatvuođat -semináras Ohcejotnjálmmis.
Komissárat áddejit dál buorebut Ohcejot olbmuid heađi.
– Dan oaidná das, ahte mo dáppe olbmot leat suhttan, dat leat beahttašuvvan, dat leat morašlaččat. Sii jerret, ahte makkár riektestáhta dát Suopma lea, go dat dahká dakkár mearrádusaid ja de guođđá olbmuid okto, dadjá komissára Ánne-Sire Länsman.
Komišuvnna ságadoalli Hannele Pokka mielas orru, ahte johkasápmelaš kultuvrra vuođđu lea áitojuvvon, go luossabivdu gildojuvvon juo goalmmát geasi. Pokka sávvá olbmuid muitalit iežaset vásáhusaid komišuvdnii, vai dat šaddet oassin komišuvnna raporttas.
– Dalle stáhtage gárttašii geahččat speadjalii ja buoridit dábiidis.
Komissára dearvvuođat Deatnogátti olbmuide lea, ahte ii galgga vuollánit.
Länsman: ”Muittuhehket stáhta, ahte das lea ovddasvástádus dán áššis”
Komissárat besse semináras gullat historjjá Deanu luossabivddus ja láhkaásahusas. Panelaságastallamis olbmot besse maid muitalit iežaset oaiviliid ja dovdduid.
Komišuvnna gullamat álget geassemánus, ja semináras sáhtiige jo soahpat áiggi gullamii.
Ánne-Sire Länsman dadjá, ahte Deanu luossabivdogielddus lea dagahan váttes ruhtadili lassin maiddái nuppástusaid guovllu sápmelaččaid sosiálalaš ja kultuvrralaš eallimii, go sii eai beasa šat bivdit luosa ja sirdit guolástanárbbi ođđa buolvvaide.
Son deattuha, ahte stáhta ii galgga guođđit Deanuleagi olbmuid okto buncut ruđalaš váttisvuođaiguin.
– Sávan, ahte hupmabehtet dáid áššiid birra jitnosit gaskaneattet ja muittuhehket stáhta, ahte das lea ovddasvástádus dán áššis, dadjá Länsman.
