Anárii leat huksemin dievva hoteallaid, vaikko huksen lea dán máilmmi dilis issoras divrras. Huksen lea koronajagiid ja Ruošša soahtedoaimmaid geažil šaddan divrasabbon go goassige ovdal. Anár lea goittot geasuhan ođđa hoteallaid das fuolakeahttá.
Maŋimuš áiggiid leat Anára guovllus ságastahttán ovdamearkan Wilderness Hotel Juutua viiddidanbarggut, Veikko Lesonen plánat luksushotellii Almaanjárgii ja Jasper Pääkkönen hoteallaplána Naŋŋánjárgii.
Anára gieldda teknihkalaš doaimma bealde muitalit, ahte gielddas leat jođus maid hotellaplána Suoločielgái ja dan lassin vel Aurora Village viiddidanplánat Avvilis.
Juvdujohgáddái plánemin luksushotealla
Lapin Kansa muitalii gieskat, ahte maiddái Juvdujohgáddái leat plánemin luksushotealla. Anára asttuáiggeássi ja investerejeaddji Mikko Silventola ostii moadde vahku dassái gieldda vihtta tomtta Juvddujoga gáttis Inari Arctic Resort -fitnodaga namas.
Guovllus lea juo lávva ja dohko lea huksenriekti oktiibuot 7 700 njealjehasa sturrosaš hotealla huksemii.
Eatnamat leat joga davá bealde, nuppe bealde Wilderness Hotel Juutua. Silventola áigumuššan lea hukset báikái stuorra ekologalaš luksusdási hotealla, mii gudnejahttá Anára luonddu ja Anárjávrri.
Dál son ohcá prošektii ovttasbargoguimmiid. Mikko Silventola jáhkká, ahte huksenbarggut sáhttet beassat johtui juo boahtte geasi dahje jagis 2025.
Son ii leat ballán, vaikko huksensuorggis ii manage dál bures ja huksen lea divrras.
– Fidnu plánemis goliha vel guhkes áigi ja mii jáhkkit, ahte muhtin gaskkas boahttevuođas huksen hálbu. Go lean johtán máŋgalot geardde jagis, de lean vásihan Anára miellagiddevaš báikin, dadjá Silventola.
Lesonen ii vel dieđe maid bargá
Lesonen plána luksushoteallas gopmánii mannan vahkus, go váldostivrra gomihii gáddelávvanuppástusa. Son lei ohcan huksen viidodahkan 5 500 njealjahasmehtera, muhto ferte dál duhttat 500 njealjahasmehterii, mii lea almmolašláva mielde fámus.
Veikko Lesonen ovddasteaddji Jukka Puolakka muitala, ahte nubbin plánan sis livčče hukset unnit luopmobarttaid, muhto áššis eai leat vel dahkkon loahpalaš áigetávvalat, go Anára váldostivrra mearrádus lei nu heahkka sáhka sidjiide.
Pääkkönen hoteallaplána ovddidišgohtet vehážiid miel
Jasper Pääkkönen muitalii Yle Sápmái dán vahkus, ahte dál go lávva lea sihkkarastojuvvon, sis álgá čielggadanbargu.
– Dego mii diehtit, lohpeproseassat bistet guhká, nappo mange konkrehta áššis dego huksemis dahje hotealla gárvvásmuvvama áigetávvalis lea veadjemeahttun dadjat dađi eambo.
Pääkkönen árvala, ahte čuovvovaš háve son bargá fidnuin aktiivvalaččat go álget hábmet arkitektuvrra.
– Muhto ahte goas dan muttus leat, dan in dieđe, dadjá Jasper Pääkkönen.
Anár gieldda váldostivrra mearridii dohkkehit gáddeláva jagis 2021. Gáddelávas bohte golbma váidaga, muhto Davvi-Suoma hálddahusriekti ja alimus hálddahusriekti gomihedje buot váidagiid.
