Oslos leat measta vahku čájehan miela Fosena bieggamilluid vuostá. Dán vahku vuossárgga sámenuorat deaivvadedje gonagasain ja kruvnnaprinssain.
Miellačájáhus Oslo stuorradikkis álggii mannan vahkus gaskavahku 11. beaivve golggotmánu. Báikki ala ledje čoahkkanan miellačájeheaddjit máŋggaid čuđiid mielde. Báikki alde lei maiddái dálkkádataktivista Greta Thunberg.
Oassi miellačájeheddjiin mearridii idjadit stuorradikkis ja gaskavahkku eahkedis bolesat gudde sin olggos. Miellačájeheaddjit sirdášedje čuovvovaš beivviin stuorradikkis Statkraft energiijafitnodaga váldokantuvrra ovdii ja bearjadaga Norgga oljo- ja energiijadepartemeantta olggobeallái.
Bearjadaga 13.10. miellačájeheaddjit čálle reive Norgga gonagas Haraldii ja bivde audiensa gonagaslaš šlohttii. Vuossárgga čieža sámenuora deaivvadedje gonagasa ja kruvnnaprinssa Håkoniin.
Suoma sámenuoraid ságadoalli Petra Laiti lei okta sis. Laiti mielde sii válde vuostá bures gonagaslaš šloahtas.
– Miihan diđiimet, ahte dat konkrehta áššit, maid sii sáhttet dahkat, leat hui unnán. Dat lei vel dehálut, ahte deaivvadeapmi lei hui olbmos nubbái ja mii vásiheimmet, ahte sii dovde dan deattu ja váibasa, maid olles dat joavku ja Fosen sápmelaččat leat vásihan čađa dan stuimmi ja dáistaleami. Dat bovttii hui olu dovdduid.
Geahča dovdduid gonagasa deaivvadeamis ievttá Ođđasat-sáddagis.
Beaska Niillas: ”Mii šaddat dál vehá bosihit”
Norgga sámiid riikasearvvi parlamentáralaš jođiheaddji Beaska Niillas lei measta vahku Oslos ordnemin miellačájáhusa. Dál son rávve ja ávžžuha olbmuid addit lobi alcceset vuoiŋŋastit. Vuollánit ii goit sáhte, son muittuha.
– Mii diehtit bures mii šaddat dál vehá bosihit. Doppe leat vuordimen dat áššit ja mii joatkit dieđus dainna bargat go leat bosihan.
Norgga oljo- ja energiijaminister Terje Aasland muitalii NRK:i, ahte sávvá áššái gávdno čoavddus ovdal go 1 000 beaivve leat gollan alimus rievtti duomus.
