30 jagi áigge anárlaš gievkkanmeašttir Heikki Nikula hearidii Suomas beaggán Aanaar-restoráŋŋa gievkkanis válmmaštallamen ja hábmemin ođđa herskkuid anárlaččaid ja turisttaid illun. Diibmá Nikula oappážagat vuvde iežaska fitnodaga ođđa oamasteaddjiide, ja mannan čavčča rájes Heikki Nikula lea beassan dušše eallit iežas bearrašiin ja johtit luonddus.
– Muhtumin orru, ahte áibbašan gievkkana huša ja bargoguimmiid. In várra dál máhcašii, muhto gal lea leamaš ahkit maiddái fiinna áššehasaid, muitala Heikki Nikula.
Restoráŋŋa Aanaar lea ožžon Heikki Nikula áigge olu fuomášumi, ja su á la carte -borramušat vuite maid alla dási gilvvuid Suomas ja Davviriikkain. Dat leamašan jagi 2019 rájes Suoma 50 buoremus restoráŋŋa listtus. Jagis 2020 Suoma Gastronomaid searvi válljii Aanaar-restoráŋŋa Suoma jagi restoráŋŋan.
Buot vulggii Nikula mánnávuođa smáhkain, maid son háliidii buktit iežas restoráŋŋa fállun. Bálkkašuvvon ámmátgoahka mánnávuođas ledje dávjá fállun seammasullasaš borramušat, go maid son iešge háliidii málestit iežas restoráŋŋas.
Sámeguovllus eai gávdno máŋga eará restoráŋŋa, gos mátkkošteaddjit beasašedje oahpásmuvvat sámi árbeborramušaide fine dining -dásis.
– Várra mii dušše barggaimet min iežamet barggu eatge geahččan maid earát ja ránnját barget. Geahčaimet málle guhkkin máilmmis ja heiveheimmet dán min sámiguovllu ávdnasiiguin. Mu mielas buoremus restoráŋŋain lea ávkkástallat dan lagamus luonddu, smiehtada Nikula.
Anárlaččaid borramušárbbit leat hui lahka Nikula váimmu, ja son niegadage dál biepmogirjjis, masa čohkkešii dološ biebmoárbbiid.
– Dat goit sáhtášii leat dákkár idea, man soaittášii ollašuhttit. Galggašii vurket dieđu boarrásut olbmuin, geat leat eallán áiggis goas ledje vel boaresáigásaš málestanvierut ja mat soitet vajálduvvat farga, dadjá Nikula.
Dán vahkus Heikki Nikula lei mielde MasterChef Professionals Suomi-prográmmas guosseduopmárin. Nikula hástalii gilvvohalliid málestit Anára luonddu ávdnasiin borramušaid. Govvemat ledje diibmá ovdal go restoráŋŋa oamasteaddjit molsašuvve.
– Dat ledje vehá dego mu earrodearvvuođat, boagusta Nikula.
