Hálddahusdiehtagiid magisttar Päivi Kontio válljejuvvui gaskavahku Ohcejoga ođđa gielddahoavdan. Kontio lea bargan gieldda buresveadjinhoavdan cuoŋománu 2023 rájes ja ovdal dan dikšunbargguhoavdan ja vuođđodorvohoavdda virgesadjásažžan sullii vihtta jagi.
Kontio illuda ođđa barggus.
– Galhan mii buohkat diehtit, ahte stuorra fatnasa ii okto sáhte jorgalit. Dasa dárbbašit buohkaid veahki, dajai Kontio váldostivrii válljejumi maŋŋá.
Kontio oainnu mielde Ohcejoga gielddas leat ovddas máŋggat hástalusat, muhto boahtteáigi orru čuovgat.
– Lean hirpmástuvvan, vuollegaš ja gealdagasas. Barggut leat olu ja stuorra áššit. Hástalusat leat nu servodagas go maiddái gielddas. Ovddosguvlui galgá goit mannat ja go čavgasit geahčan boahttevuhtii, de jáhkán ahte das šaddá buorre, dadjá Kontio.
Dál son hálidages ovttas gieldalaččaiguin ovttasbargat gieldda ovdii.
– Dán barggus basttán ovttas gieldalaččaiguin ovddidit gieldda ovddosguvlui ja guldalan sin jiena. Dovddan ja dieđán sin duogáža ja árgaeallima, dadjá Kontio.
Tapiola: ”Barggut, maid son fuolaha, dat maiddái bohtet bargon”
Ohcejohkii leat šaddan oanehis áiggi siste válljet guktii ođđa gielddahoavdda, go ovddeš gielddahoavda Taina Pieski álggahii Sámemusea Siidda museahoavdan borgemánus. Ođđa gielddahoavda álggaha barggus nu jođánit go vejolaš.
Ohcejoga váldostivra lahttu Ilmari Tapiola (guovddáš) lei okta sis, guhte doarjjui Päivi Kontio válljema ođđa gielddahoavdan. Sus lea luohttámuš dasa, ahte ođđa gielddahoavda bissu virggistis.
– Gal mus lea dasa luohttámuš, go Päivi leamašan dáppe juo máŋga jagi. Leat oaidnán, ahte dat barggut, maid son fuolaha, dat maiddái bohtet bargon ja dáhpáhuvvet hui johtilit. Áššiid, maid son ii dieđe, son váldá čielgasa, eaige dát báze sus heaŋgát goassige. Visot mearrádusat ja evttohusat bohtet áiggil, rábmo Tapiola.
– Sus lea buorre oktavuohta gielddadálu bargiiguin. Dat juo mearkkaša olu, ahte sáhttá ovttasbargat, lasiha Tapiola.
Guttorm: ”Mu luohttámuša son oažžu gal ollásit”
Ohcejoga váldostivra gárttai jienastit guovtti olbmo gaskkas, danin go gielddastivrra lahtu Pirjo Konttinen (kristtalašdemokráhtat) evttohii gielddahoavdan soahtediehtagiid magisttar ja ovdaoffiseara Sami Jalonena Kustavis. Kontio válljejuvvui jienaiguin 12–3.
Gielddaráđđehusa ságadoalli Väinö Guttorm (kristtalašdemokráhtat) guottihii Jalonena válljema. Guttorm namuhii sáhkavuorustis, ahte gielddas galggašii duostat geahččat maiddái olggobeallái, iige válljet gielddadálu siste olbmo jođihit olles gieldda.
– In oaivvil, ahte son ii livččii heivvolaš, muhto mun livččen hálidan oaidnit, makkár jurdagiid buktá olmmoš, guhte boahtá áibbas olggobealde gieldda, dadjá Guttorm.
Vaikko ođđa olbmo válljen lea lossat gildii, ii Väinö Guttorm goit bala ođđa hoavdda válljemis, jos eallin nu čájeha.
– Eat mii sáhte dáhkidit geange olbmo bokte, ahte son bisošii dáppe. Eat mii olbmuid eallimiin dieđe, mo dat mannet ovddosguvlui ja mo dat rivdet, dadjá Guttorm.
Guttorm sávvá ja jáhkká, ahte Kontio hovdemiin Ohcejohka manná ovddosguvlui.
– Mu luohttámuša son oažžu gal ollásit. Vaikko iežas miela mielde ii álo mana, nu álo galgá gieldda buorrin bargat, dadjá Väinö Guttorm.
Divvojuvvon 30.11.2023 dbm 10:45: Päivi Kontio lea bargan buresveadjinhoavdan, ii sosiálahoavdan nu mo ovdal muitaleimmet.
