Soahtehárjehus čohkke Eanodahkii duháhiid soahtehárjehalliid, ja dat váikkuha guovllu árgabeaivái. Lea lunddolaš, ahte stuorra soahtehárjehus boahtá váikkuhit maid báikkálaččaid eallimii, muitala májor Mikko Kuusisto.
– Hárjehusa áigge guovllus johtet olu militearafievrrut ja -olbmot. Máŋggat idjadanbáikkit leat várrejuvvon bealuštanfámuid geavahussii. Hárjehusjoavkkut dieđus maid váikkuhit johtolahkii ja guovllu bálvalusaide, logahallá Kuusisto.
Gaskavahku 21.2. Bealuštanfámut dolle infodilálašvuođa Heahtás, mas muitaledje earet eará makkár guovlluin Suoma, Ruoŧa ja Norgga oktasaš Nordic Response Nato -soahtehárjehusat leat.
Nordic Response 24 -soahtehárjehus lágiduvvo 4.–15.3.2024. Soahtehárjehusjoavkkut čoahkkanišgohtet 29.2. rájes Eanodahkii ja dáistalanhárjehusat álget 7.3. muitala Kuusisto.
Kuusisto mielde ii goittot dárbbaš ballat johtimis meahcis vaikko soahtehárjehusat leatge.
– Bealuštanfámut sirrejit dakkár guovllu, gos leat dáistalanhárjehusat jođus nu ahte dohko eai beasa olggobeale olbmot.
Gánniha goit garvit jus oaidná hárjehusjoavkkuid johtimin dahje čoahkkanan muhtin báikái, dadjá Kuusisto.
– Mii geahččalat váldit vuhtii eará doaibmiid nu bures go vejolaš, eandalit boazodoalliid. Mishan lea buorre ovttasbargu ja ulbmilin lea oktasaš kompromissa ja dainna lágiin unnidat váikkuhusaid boazodollui.
Nordic Response 24 -soahtehárjehus dáhpáhuvvá sihke áimmus, mearas go maiddái eatnama alde. Hárjehussii gullet girdinhárjehusat Norgga, Ruoŧa ja Suoma davviosiin. Suoma bealde girdimiid dahket eandalitge Oarje-Lappi guovllus.
Vuosttas hárjehus Nato lahttun
Suopma oassálastá dál vuosttas geardde Nato lahttun oktasaš soahtehárjehussii.
Nordic Response 24 lea stuorámus riikkaidgaskasaš soahtehárjehus, masa Suoma bealuštanfámut váldet oasi olgoriikkain. Dat čohkke oktii birrasiid 20 000 soalddáha 14 sierra riikkas.
Suomas soahtehárjehussii oassálastet oktiibuot sulaid 4 100 olbmo ja birrasiid 700 fievrru. Suoma guovllus hárjehallet ja lihkadit suopmelaš joavkkuid lassin sulaid 3 000 ruoŧŧelačča, 450 fránskalačča ja vel birrasiid 50 stuorrabritánnialaš soalddáha.
Eanodaga guovllus Suoma ja Ruoŧa soahtefámut hárjehallet oktan divišuvdnan dahje joavkun. Joavku johtá Norgga geainnu E45 mielde. Oktiibuot dán joavkkus lea 2 500 olbmo.
