Dán rádjai olbmot leat diehtán dušše dan, ahte njukčamánu áigge šuvihit duháhiid mielde soalddáhat Eanodaga guvlui Nato Nordic Response 2024 -soahtehárjehussii. Gaskavahku bealuštanfámut ordnejedje báikki olbmuide dilálašvuođa, mas muitaledje lasi dieđuid hárjehusas.
Neakkellaš Iisko-Matti Näkkäläjärvi lei smiehttan gártágo son jo guđa áigge vuoddját ruovttustis Neakkelis bargui vai geargá ovcci áigái Heahttái. Ovddalgihtii lei dieđus ahte Heahtás Norgga guvlui lea olu johtolat.
– Dat muitaledje, ahte diekkár minuhtas logi minuhttii sáhttá gártat vuordit. Diet ii leat nu varalaš, jus dan vuordá. Ja somáhan dat lea geahččat dieid militearahommáid, dadjá Iisko-Matti Näkkäläjärvi.
Su mielas ii leat ollenge bahá, jus hárjehus oidno su eallimis.
– Ii mus leat nu hoahppu dohko bargui. Ruoktot ii leat nu hoahppu goassige.
Su nieida Kristiina Näkkäläjärvi fas jurddašii luonddu birra.
– Luondu lea munnje nu dehálaš ášši, min hearkkes luondu dáppe. Jus dákkár stuorra hárjehallamat bohtet deike ođđasit ja ođđasit, de mo dat leat váldán dan vuhtii, smiehttá Kristiina Näkkäläjärvi.
Dieđihandilálašvuođas muitaledje, ahte soalddáhat johtet hárjehusguovllus eanaš sabehiiguin, mohtorgielkkáin ja geahppa boagánguorbmebiillain.
Infodilálašvuođas jerre maiddái, mo neahtta boahtá ollit, go nu olu bohtet olbmot lagaš birrasii. Bealuštanfámut dadje, ahte sii ieža nanosmahttet neahttasignála ja ceggejit iežaset doarjjastašuvnnaid. Sii maiddái muittuhedje, ahte soalddáhat eai oaččo geavahit telefovnnaid hárjehusaid áigge.
Dáistalanhárjehusat eai leat lahka dáluid
Soalddáhat orrot hárjehusa áigge miehtá Eanodaga ja eanaš meahcis.
Bealdovuomi ja Vuottesjávrri guovllus ásset suopmelaš soalddáhat. Mielde leat badjel duhát reservalačča, nappo dakkára, geat leat čađahan soahteveaga ja dál leat bovdejuvvon hárjehallat amaset soahteveaga oahput vajálduvvat.
Ruoŧŧelaš soalddáhat fas leat girdigietti ja Bálojávrri guovllus.
Heahtá gilis orrot ovdamearkka dihte offisearat, dálkkodeaddjit ja fuolahusossodahkii gullevaš joavkkut.
Eanemus hárjehusat oidnojit daid beivviid go joavkkut johtet Eanodahkii. Dáistalanhárjehusat leat eandaliige Heahtá-Leaibejávrri ja Bálojávrri guovllus 7.–9.3.2024. Dáistalanhárjehusaid eai čađat dáluid ja čoahkkebáikkiid lahka.
Áibmobealuštanhárjehusat maid leat, muhto ulbmilin lea garvit giliid dahje ealuid.
