Sámefilmmat birgejedje bures Suoma stuorimus filbmasuorggi gálas, go sihke Katja Gauriloff bagadan fiktiivvalaš guhkesfilbma Je'vida ja Suvi West ja Anssi Kömi bagadan Máhccan-dokumeanta čogge dievva Jussi-bálkkašumiid.
Máhccan dokumeanta válljejuvvui jagi dokumeantafilbman. Vuoitoságas Suvi West doalai sámegillii, ja son loahpahii sáhkavuorus ávžžuhemiin heaitit soađi Gazas. Sus lei lávddi alde gieđas maid Gaza-galba.
- Heitet álbmoga goddima Gazas, West čurvii suomagillii.
Máhccan-dokumeanta ja dan dahkkiguovttos oaččuiga maid Nordisk Film -foandda 20 000 euro bálkkašumi.
Máhccan čuovvu dološ gálvvuid, mat máhcahuvvojit Sápmái maŋŋá go leat leamašan jahkečuđiid iešguđetlágan museain ja vuorkkáin miehtá máilmmi.
Katja Gauriloff ja Niillas Holmberg čállin Je'vida-filbma lei evttohassan oktiibuot čieža iešguđet kateogoriijas: jagi filbma, giehtačálus, govven, čuohppan, bivttasteapmi, musihkka ja jietnaplánen. Filmma bargojoavku čokkii Jussi-bálkkašumiid bivttasteamis, musihkas ja jietnaplánemis.
– Huh, giitu, lean duohta ilus ahte ožžon dahkat musihka ná earenoamáš filbmii, ja ahte dat oaččui leat minimistalaš, hearkkes ieš, dajai Je'vida-filmma musihkas vástidan Laura Naukkarinen bálkkašansáhkavuorustis.
Je'vida lea historjjá vuosttas nuortalašgielat guhkesfilbma. Dat muitala vuorrasut nuortalaš nissonis, guhte máhccá ruovttoluotta Sápmái vuosttas háve dan maŋŋá go fárrii máttás suomaiduhttima áigge.
Dát lea mielahis fiinna ášši, namuha Gauriloff Yle jearahallamis ovdal Jussi-gála álggu. Loahpa loahpas Je'vida ii ožžon jagi filbma -bálkkašumi. Dan vuittii Mummola, man lea dahkan Tia Kouvo.
– Vaikko ovttage bálkkašumi eat oaččošii, de mun lean nu rámis das go mis leat ná ollu evttohasvuođat. Sávan gal, ahte dán fiinna bargojovdkui muhtin bálkkašumitge boađasedje, dajai Gauriloff álgoeahkedis bearjadaga.
