Dán vahkus de álget ivdnás dolggit bohraidit ja glitter šealgut, go eurovišuvdnavahkku álgá ja karneváladovdu leavvá miehtá Eurohpá.
Dánge jagi eurovišuvnnaid sáhttá čuovvut sámegillii. Oahpes jienat láidestit sámegillii Eurovišuvnna musihkkagilvvu, Aslak Paltto davvisámegillii ja Heli Huovinen anárašgillii.
– Movttegis ja vuordi dovdu. Goassige ii dieđe mii njuolggosáddagis dáhpáhuvvá, muitala Huovinen.
Paltto ja Huovinen leaba leavssuideaskka dahkan ja ráhkkanan láidesteapmái
Huovinen muitala, ahte soai geahččaba ja oahpásmuvvaba ovddalgihtii ovdanbuktimiidda.
– Mun lean oaidnán máŋggaid gilvaleaddjiid musihkkavideoid ja smiehttan makkárson show sis lea dasto lávddi alde.
Movttegis, buorre miela lávlungilvui ealláseapmi boahtá seammás, go manná Helssegii ja deaivá earáid, geat barget Eurovišuvnnain.
Bargolánjas, gos soai čilgeba gilvvu sámegillii, eai discospáppat jora, iige Huovinen čiŋat čuovgi čuvllain.
– Gánniha nahkehit vuogas biktasiid. Ferte goit nu máŋga diimmu loaiddastit. Sávvamis lea dakkár bargolatnja, gos oažžu lása rabas ja ráinnas áimmu, himiha Huovinen.
Sámegielat láidesteami lea vejolaš čuovvut Yle Areenas
Maŋŋebárgga lea vuosttas semifinála ja doppe gilvala maiddái Suopma. Maiddái Ruoŧa lávlla oidno ja gullo maŋŋebárgga semifinálas, muhto sii besset njuolga gitta finálii, daningo Ruoŧŧa vuittii diibmá.
Dán liŋkkas beasat maŋŋebárgga čuovvut ja guldalit sámegielat láidesteami. Sátta álgá diibmu 22.
Nubbi semifinála lea duorastaga. Dalle lávddi alde oaidnit Norgga.
Ieš finála lea lávvardaga 11.5.2024. Sátta álgá dii. 22.00. Ruoŧa SVT sádde sámegielat láidesteami SVT Play bokte.
Dán artihkkala bokte beasat suomagillii čuovvut ja oahpásmuvvat Eurovišuvnna musihkkagilvvu dovdduide ja dáhpáhusaide.
