Mátkkálašmáksu lea ságastahttán Sámis maŋimuš áiggiid. Roavvenjárggas ja Anáris leat nu daddjon turismavearu leat váillahan juo muhtin áiggi.
Suoma ráđđehus lea dál maid gieđahallagoahtán ášši. Ráđđehus evttoha, ahte nu daddjon turismavearu geahččaladdan dahkkojuvvošii dihto guovlluin. Ráđđehus ii leat goittoge vuos namuhan guđe guovlluin mávssu iskkašedje.
Ovdal dan čielggaduvvojit čađahaneavttut earret eará lágaid ja gielddaid ekonomiija ektui.
Ruhtaministeriija ealáhusvearroovttadaga hoavda Jari Salokoski dadjá, ahte mátkkálašmávssu atnuiváldin eaktuda vearuhusa láhkaásaheami rievdadeami.
Vuos ministeriija ferte goittotge čielggadit, man stuorra dárbu máksui lea, mo boađuiguin sáhtášii ávkkástallat ja makkár vejolaš negatiiva váikkuhusat das soitet leat. Dan maŋŋá láhkaevttohus manašii vel cealkinláhkai.
Mo geavvá bargomátkkálaččaide?
Salokoski muittuha, ahte Mátkeealáhussuorggi lihttu lea vuostálastán turismavearu. Dasa lassin ferte guorahallat, guoskágo máksu dušše olgoriikalaš turisttaide vai maiddái riikka siskkáldas mátkkálaččaid, ja mo dat váikkuha ovdamearkka dihte bargomátkkálaččaide.
Salokoski goittotge jáhkká, ahte turismavearu lea vejolaš ollašuhttit aŋkke muhtin hámis.
Turismavearru lea dábálaš maiddái Eurohpá turismaguovlluin. Vearuin ruhtaduvvojit dábálaččat golut, maid mátkkálaččat dagahit guovllus.
Mátkeealáhussuorgi ja Lappi riikkabeaiáirasat eai leat leamaš ovttaoaivilis das, leago mávssu bearran gánnáhahtti ja mo dat geavatlaččat čoggojuvvošii.
Norggas turismavearroášši lea ovdánan jo guhkibui. Doppe gielddain oaččošedje ieža mearridit, váldetgo joba viđa proseantta vearu idjadeamis.
Girkonjárggas mátkeealehusa doaibmit guottihit jurdaga turismavearus, muhto turisttat eai movttás jurdagis jo muđuige divrras riikkas.
