Sääʹmteʹǧǧ reäšš saǥstõõllmõõžžid nuõrttsääʹmǩiõl vueʹjjest. Saǥstõõllâmräidd lij vueʹssen Sääʹmteeʹǧǧ ǩiõllpoliittlaž toiʹmmjem- da õõuʹdeemprograammâst iiʹjjid 2025–2027.
Sääʹmteeʹǧǧ tiuddsååbbar lij piijjâm vaalpââʹj kuʹǩes äiʹǧǧkõõsk tåimman nuõrttsääʹmǩiõl jeälltummuž, raavummuž da õõuʹdummuž. Sääʹmteeʹǧǧ vuäinnmõõžž mieʹldd nuõrttsääʹmǩiõl vueʹǩǩ čårran aanar- da tâʹvvsääʹmǩiõli vueʹjjest da õõlǥat jeeʹrab tååimaid tõn jeälltem õuʹdde.
Vaʹǯǯtõsân lij tobdstum tõt, što nuõrttsääʹmǩiõl jeälltummuž leʹbe veiddsõbân ǩiõllplaanmõõžž ij koordinââʹst ni kååʹtt vueʹsspieʹll systemaattlânji. Sääʹmteʹǧǧ haaʹlad ååʹn kåččad jeeʹres toiʹmmjeeʹjid saǥstõõllâd, mõõn-nalla nuõrttsääʹmǩiõl jeälltemtuâjast vuäitčeš õuddned.
– Nuõrttsääʹmǩiõl vueʹǩǩ taarbaš lââʹzz tuärj da vuâmmšõõzz da tõʹnt mij ǩiččlõõttâp ââʹn jeänab kaggâd pââjas tõn da čiŋlmõõvvâd tõõzz, mäʹhtt sääʹmǩiõl jeälltummuž vuäǯǯat viõkkšubun da mâid vueiʹttep ânnʼjõž resuursivuiʹm tuejjeed, mušttal Sääʹmteeʹǧǧ ǩiõllstaanpiisar Anne Kirste Aikio.
Saǥstõõllmõõžžid riâžžât teeʹmi mieʹldd. Vuõssmõs saǥstõõllmõš lij mââibaarǥ 29.4.2025 da teeʹmmen lij sääʹmǩiõllsaž ouddpeâmm. Puk saǥstõõllmõõžžid riâžžât ougglõsõhttvuõđi pääiʹǩ. Puk saǥstõõllmõõžžid kaaunak Sääʹmteeʹǧǧ neʹttseeidain.
Aikio mieʹldd sääʹmǩiõllsaž õutstõõzzâst lie jiânnai huõl ouddmiârkkân vuâđđkääzzkõõzzin.
– Peiʹvvhåidd da škooul lie pueʹrmõs nääʹl jeällted ǩiõl. Tõid leäʹp piijjâm jiânnai resuursid. Sääʹmǩiõlâst lij še jõnn kõõddâs mainsted ǩiõl da mij haaʹleep še tän mentaalʼlaž peälla čiŋlmõõvvâd, särnn Aikio.
