Uccjooǥǥ ååraž Gava Ilmar Eila leʹbe Eila Tapiola ǩiõđin šâʹdde nuʹtt saaʹmi peʹssertuâj ko še äʹrbbvuõđlaž sääʹmpihttâz. Tapiola lij mättõõllmen ǩiõtt-tuâjaid pååđämmat-tuʹtǩǩõõzzâst. Juʹn nuõrrvuõđâst son lij tuejjääm suu dommpääiʹǩ mallsaž määccǩid da kååʹddǩid, leâša jieʹnn beäʹl sooǥǥ äʹrbbvuõđ jie leäkku leämmaž čuuʹt tobddâz.
– Muʹnne lij leämmaž samai vääžnai. Ko leäm šõddâm Uccjooǥǥâst, nuʹtt jiõm leäkku piâssâm päärnžen vueiʹnned ââlda ouddmiârkkân saaʹmi ǩiõtt-tuâjai tuejjummuž. De ââʹn leäm piâssâm tõn vueiʹnned da tõt lij leämmaž tuõđi miârkteei, mušttal Tapiola.
Eila Tapiola Iireʹšǩ-jeäʹnn jaaʹmi, ko son leäi tåʹlǩ siõm niõđâž. Håʹt-i piârrjest õhttvuõtt jieʹnn ruåđid lij seillam, lij Tapiolast pâi leämmaž toobd, što son haaʹleʹči veâl mättjed nuõrttsääʹmvuõđstes.
Son mättõõli nuõrttsääʹmǩiõl da lij tåimmam sääʹmǩiõl uʹčteeʹlen. Pääʹljes jieʹnnes beäʹl sääʹmpreeddnid iʹlla leämmaž pâi hiâlpp.
– Kuuitâǥ jõs tuõđ mainstam, tõn mâŋŋa tõt lij pääccam. Ââʹn muʹst feʹrttai tuejjeed mâid-ne, što jiõm mõõnât tõn ǩiõl oʹđđest, smeâtt Tapiola.
Jiõčč ǩiõl mättjummuš leäi Tapiolaaʹje hiâlpp: tâʹvvsääʹmǩiõlâst da nuõrttsääʹmǩiõlâst lij jiânnai seämma. Psyykklaž pieʹll leäi lossääb.
– Feʹrttjem ǩiõttʼtõõllâd tobddmõõžžid ǩiõlâst da kulttuurâst. Kuuitâǥ leäm ǩiččlâsttam, što sääʹm lie priimmâm muu. Jiõm leäkku ni kuäʹss õlggâm smiõttâd, što leäm-a mon avi vuäitam-a mon. Õutstõs lij pâi teâttam, ǩii mon leäm da mõʹnt haaʹlääm lookkâd ǩiõl, särnn Tapiola.
Hiâlpab väʹldded mååust peʹssertuâjaid ko ǩiõl
Håʹt-i nuõrrpoodd Eila Tapiola ij šõddâm sizz nuõrttsääʹmkultuuʹre, lij son siõmmnai siõmmnai vuäǯǯam silttõõzz da teâđ jiijjâs nuuʹbb sääʹmkulttuurâst.
Ǩiõtt-tuâjain da peʹssrin šõʹdde suʹnne nääʹl tobdstõõttâd jieʹnn beäʹl kulttuuʹre.
– Vuäinam tõn õutstõõzz diõtt, što lij vääžnai, što nuõrr oummu mättâʹlle ǩiõtt-tuâjaid. Muʹnne tät lij mäʹtǩǩ jiijjan preeddnid da piâzzam vueiʹnned, måkkam täk heäʹrvvmaall lie da mäʹhtt tõid tuejjeet, särnn Tapiola.
Tän räjja son lij tuejjääm määŋgid jeeʹresnallšem sääʹmǩiõtt-tuâjaid, kook lie puättam še jeärrsi âânnmõʹšše. Tän poodd Tapiola kuuitâǥ õinn cääkk päʹrnnpooddâst toobdâs Uccjooǥǥ maall määccaǩ ool, leâša miõlâst lij juʹn juurd nuuʹbb mallsaž pihttsid.
– Ååskam leäm vuäǯǯam tõn kulttuur muu juõʹǩǩ peivvsaž jieʹllma še. Muʹst lij samai jõnn kõõddâs teâvõõttâd sääʹmpihttsid. Jiõm tieʹđ, puäđam-a ni kuäʹss cääʹǩǩed, leâša možât måtam peeiʹv. Muʹst leʹčči miõll kuärrad jiõccsan puk pihttsid. Leäm kuärškuättam šaamšiǩ jiõccsan, leâša jiõm tieʹđ, puätt-a tõt âânnmõʹšše.
Mallân suʹst lij ääkk vuäʹmm šaamšiǩ, koon mieʹldd son haaʹlad tuejjeed peʹsserhieʹrvid. Kõʒʒ lij juʹn alttuum. Tapiolaaʹje lij hiâlpab väʹldded mååust peʹssertuâjaid ko ǩiõl.
– Ǩiõtt-tuâj mättõõllmõš lij hiâlpab ko ǩiõl. Tõʹst lij tõt šuurmõs kõõddâs. Tuâjain lij jiijjâs ǩiõll. Tuâjain lij hiâlpab leeʹd õlmmsânji ko mainsted säämas, smeâtt Tapiola.
Siõmmnai siõmmnai son äigg kuuitâǥ väʹldded tõn lääuʹǩ ooudårra, što ǩiõll koolči še arggpeivva seämmanalla ko ǩiõtt-tuâj.
– Tõt kõõddâs lij jeänab tuu vueiʹv seʹst ko jeärrsi čõõʹlmin. Õõlǥči tåʹlǩ tuõsttâd njoikkad tõn kõddâz pâʹjjel.
