Guovloalaguoddi lea loahpahan ovdadutkama áššis, mas sihke Sámedikke ovddeš stivra ja válgalávdegoddi ledje navdojuvvon rihkkosiin. Dát boahtá ovdan guovloalaguoddi Katri Junnikkala-Heikkinen 7.5. dahkan mearrádusas.
Boles navddii válgalávdegotti lahtuid ja Sámedikki ovddit válgabaji stivralahtuid sivalažžan olggušteapmái ja virgegeatnegasvuođa rihkkumii Sámedikki jagi 2023 válggaid oktavuođas.
Ášši duogábealde lea jagi 2023 válggaid válgalogahallan. Sámedikki válgalávdegoddi ii čáhkadan jagi 2023 válggaid jienastuslohkui buohkaid sin, geaid alimus hálddahusriekti lea dohko dohkkehan.
Áššis navde rihkkosa, danin go válgalávdegoddi mearridii áššis alimus hálddahusrievtti čovdosa vuostá. Oktiibuot bolesii dahke 74 rihkusalmmuhusa jagi 2023 sámediggeválggain. Boles dutkkai ášši 63 olbmo oasil.
Alaguoddi mearrádusa mielde dutkan loahpahuvvo, go son boađášii hilgut ášši iige dehálaš priváhta dahje almmolaš ovdu gáibit joatkit dutkama dahje ášši čuoččáldahttima. Dasa lassin ovdadutkamis eai leat boahtán ovdan dakkár bealit, mat doarjjoše áššáskuhttima.
Dutkama jođiheaddji Iikka Rantahalvari lei evttohan ovdadutkama loahpaheami alaguoddái.
– Ovdadutkama ja duopmostuollogieđahallama ulbmil lea ollašuhttit rihkusovddasvástádusa iige čoavdit dan, gii galggašii gullat válgalogahallamii ja gii ii, ákkastalai Rantahalvari evttohusas alaguoddái.
Gizzu sámedikki válgalogahallamis álggii, go alimus hálddahusriekti dohkkehišgođii olbmuid válgalogahallamii Sámedikki dáhtu vuostá. Ovttastuvvan našuvnnaid komiteaid čovdosiid mielde alimus hálddahusrievtti mearrádusat leat loavkidan sápmelaččaid iešmearridanrievtti. Alaguoddi atná dán duogáža dohkkehahtti sivvan Sámedikki válgalávdegotti ja stivrra mearrádusaide.
Divvojuvvon 11.5. dii. 16.59 Iikka Rantahalvari namma.
Divvojuvvon 12.5. dii 15.36 Alaguoddi dieđáhusa mielde rihkusalmmuhusa ledje dahkan 74 olbmo.
