Ohcejogas áigot lasihit turismma. Dattege gieldalaččain lea fuolla das, ahte doaimmas šaddá seammalágan mássaturisma dego Anáris. Ovdamearkka dihte diibmá Avvila girdigietti bokte johte 250 000 turistta.
Ohcejoga gielda leage čielggadišgoahtán, mo hukset ođđa bálvalusaid ja dinenvejolašvuođaid go luossaturisma geassit lea nohkan luossabivdogildosiid dihte. Luondduriggodatguovddáža dieđuid mielde Ohcejoga gielda lea massán 10 miljon euro luossaturismma nuppástusaid dihte.
Pentti Pieski konsultere Ohcejoga turismafidnu, mii ovddida guovllu luossaturismma. Son lohká, ahte ulbmilin hástalit báikegotti turismafitnodateaiggádiid, geat barget luossaturismmain.
– Dál go luossabivdu lea gildojuvvon de turismafitnodagat leat báhcán unnán atnui. Jurddan lea rahpat ságastallama das, man láhkai smávvalágan turismma sáhtášii ovddidit guovllus.
Pieski mielde vuođđun lea dat, ahte báikkálaš čehppodaga, historjjá ja guovllu erenomáš johkasámekultuvrra sáhtášii ávkkástallat maid turismabálvalusaid bokte.
– Dasa ii livčče dárbu dahkat stuorra investeremiid muhto beare divodit báikkiid ja smiehttat baicce dan bálvalusa, maid mii fállat.
Gieldda turismma boahttevuođaplánas lea earret eará márkanastit gieldda sevdnjodaga ja jaskatvuođa.
Pieski: Ohcejoga hálidit bisuhit eakti guovlun
Anáris turisma lea sturron sakka maŋimuš jagiid ja buktán mielddis maiddái hástalusaid gildii. Ovdamearkka dihte Anára dearvvasvuođafuolahus ii biso laskan turismma maŋis.
– Ohcejogas muhtumat gehččet vehá gáđaš čalmmiin dan, man láhkai turisma ovdána Anáris ja mo gielddas manná ekonomalaččat bures. Liikká olbmot eai hálit Ohcejohkii seammalágan turismma.
Pieski mielde Ohcejogas ballet mássaturismma ja dan, man láhkai guovlu rievddašii dan mielde.
– Ulbmilin lea addit molssaeavttu mássa- ja luksusturismma sadjái ja smiehttat, sáhtášiigo turismabuvtta gávdnot árgabeaivvi vásáhusain.
Vaikko turismasuorggis leat ollu ovdánanvejolašvuođat, de Ohcejoga hálidit bisuhit Pieski sániiguin eakti guovlun, vai turisma ii hálddaš birrasa.
– Jus dat dahkko rivttes vuogi mielde, de turisma lea maiddái luonddu ja kultuvrra dáfus suvdilis, iige rievdat birrasa iige báikkálaš eallinvuogi.
Báikkálaččat guottihit smávvaturismma
Ohcejohkalaš Lávra Länsman oaidná turismmas sihke buriid ja heajos beliid. Vaikko dat buvttašiige ruđa ja bargosajiid gildii, de ii datge boađe nuvttá.
– Jos bohtet dievva turisttat dasto dat dieđusge čuohcá dan báikkálaš eallimii.
Son guottiha smávvaturismma lasiheami gielddas. Seammás son lea goittotge fuolas das, mo báikkálaš luondu gierdá lassánan olmmošmeari.
– Dat sáhttá vahágahttit birrasa, go eambbo olbmot johtet luonddus. Turisttat eai vealttekeahttá dieđe, mo luoddus gálgá láhttet nu ahte dan atná árvvus, Länsman lohká.
Maiddái Jouni-Esa Nousuniemi lea fuolas luonddu gierdinnávccain.
– Turismma ferte ráddjet aisttan, meahcis vánddardeapmi heađušta boazodili ja seamma gielkávuodjin.
Nousuniemi dattege lasihivččii turismma gielddas, muhto dušše vehá.
– Mu mielas gal ožžošii vehá lasihit, muhto ii nu ollu go Anáris. Dan fertešii ráddjet dáppe Ohcejogas.
Divvojuvvon 16.5.2025 diibmu 13.02: Pentti Pieski bargá fitnodatdoallin Ohcejoga gieldda fidnui, iige son leat gieldda bargi fidnus.
Divvojuvvon 16.5.2025 diibmu 13.57: Bajilčála rievdaduvvon hápmái: ”Ohcejogas áigot ovddidit mátkeealáhusa – Buohkat eai hálit turisma stuorrut dakkárin go Anáris”. Ovdal čáliimet, ahte ”Ohcejogas áigot ovddidit mátkeealáhusa, muhto eai dakkárin go Anáris – gielddas ballet mássaturismmas”.
