Anára gielda lea viidodaga dáfus Suoma stuorámus gielda ja doppe leat olu doaresbeale gilit guhkkin gieldaguovddážis.
Dál Anára dorvvolaš gilit -fidnu olis háliidit buoridit giliid dorvvolašvuođa, muitala fitnu prošeaktajođiheaddji Heini Kontsas.
Sii ordnejedje dorvvolašvuođaplána olis deaivvadeami Nuorta-Anáris Njellimis, mii lea áibbas Ruošša rájá lahkosis.
Teija Tamminen lea fitnodatdoalli ja bargá turisttaiguin. Son dadjá, ahte jávregáttis galggašii leat távval mii váruha suttiin, ja das galggašii leat maid heahtenummir, sávvá Tamminen.
– Jávri lea váralaš ja lean ballan, ahte goas dáhpáhuvvá mii nu lihkohisvuođaid. Turisttat jurddašit, ahte go lea muohta, de doppe sáhttá vázzit, muhto ii dáppe sáhte juohke sajis johtit, muitala Tamminen.
Dorvvolašvuođaáššit ja plánat leat ovdalge leamašan su mielas. Son ássá nuortarájá lahka, ja dorvvolašvuohta bođii jurdagiidda dalle, go Ruošša fallehii Ukrainai.
– Mun lean alccen ráhkadan dorvvolašvuođaplána ovdal go mii searvvaimet Natoi. Mun jurddašin, ahte mun áiggun báhtarit Norgii, dadjá Tamminen.
Juohke gilis guovttis galget vástidit dorvvolašvuođas
Fidnu johtá miesse- ja geassemánus Anára giliid mielde. Sii čogget bártebáikkiid lassin dieđuid olbmuid dáidduin ja juobe tráktoriin.
Giliin fertejit leat olbmot, geain lea vuosttasveahkkedáidu.
– Gádjunlágádus lea beroštuvvan diehtit tráktoriin. Jus boahtá dárbu, de dihtet geas luoikkahit, čilge Heini Kontsas.
Dássážii lea boahtán ovdan, ahte giliide háliidit Defibrilláhtor-mášena. Dat sáhttá heahtedilis gádjut váibmobuohcci heakka.
Juohke gillái dárbbašit maiddái guokte olbmo, geat vástideaba dorvvolašvuođas ja leaba gulahallanolbmot.
– Juos ovdamearkka dihtii boahtá dárbu oažžut gilis veahki dahje dieđuid, čilge Kontsas gulahallanolbmo doaimma.
Anára dorvvolaš gilit -fidnu lágida giliid oktavuohtaolbmuide skuvlema boahtte jagi álggus. Dalle dorvvolašvuođaplánat leat gárvá ja daid geigejit ovdamearkka dihte gádjunlágádussii.
Plánen buktá dorvvolaš dovddu
Aimo Koistinen mielas Njellim lea oalle dorvvolaš báiki. Su mielas lea dehálaš, ahte olbmuin lea diehtu juos juoga dáhpáhuvvá. Son váillaha earret eará buoret telefon- ja neahttaoktavuođaid.
– Dat bohciidahttá dorvvolašvuođadovddu, go dákkár prošeakta lea jođus. Máŋgga olbmos leat dakkár dovdu, ahte gosa dát máilbmi lea riekta mannamin.
