Kriterat sámemátkeealáhusa sertifikáhta várás leat farggabáliid gárváneamen, muitala plánejeaddji Kirsi Suomi. Son lea bargan badjel gávcci jagi Sámedikkis iešguđet mátkeealáhusfidnus. Sámedikkis lea dál jođus jo čihččet fidnu vásttolaš sámemátkeealáhusa ovddideapmen.
– Mii leat čohkken 42 bákkolaš kritera listtu. Dan lassin leat vel moaddelot válljen- ja erenomáškritera.. Dat lea mannan kommenteremii sápmelaš turismafitnodatdoalliide, muitala Suomi.
Álggos listtus ledje sullii 450 kritera, muhto meari leat áiggi miel geahpedan nu ahte listtus leat dál šat oktiibuot 62 kritera.
– Dát kriterat vuođđuduvvet Sámemátkeealáhusa ehtalaš rávvagiidda, man sámedikki dievasčoahkkin dohkkehii jagis 2018, muhto maiddái sertifikáhtaide, mat leat anus eará guovlluin máilmmis, čilge Suomi.
Kriteralistu vuolgá dan maŋŋá gieđahallamii Sámedikki ealáhus- ja vuoigatvuohtalávdegoddái, ja dasto stivrii ja dievasčoahkkimii.
Okta dehálaš kritera sertifikáhta oažžumii lea dat, ahte fitnodatdoalli lea ieš sápmelaš. Fitnodatdoalli ferte maid muitalit dárkilit, gos guovllus su fitnodat doaibmá ja man láhkai dat váikkuha birrasii ja lundui.
– Mii hálidat veahkehit ja buoridit sámi turismafitnodagaid doaimma eará fitnodagaid ektui, dadjá Suomi.
Dan, gii sertifikáhta mieđihivčče, lea vel rabas.
– Dat lea vel gaskan, muhto ulbmilin livčče ásahit dan várás iežas lávdegotti, mas livčče ovddasteaddjit Sámedikkis, mátkeealáhusas ja eará čanasjoavkkuin, logahallá Suomi.
Fitnodatdoalli: Buorre, jus dainna sáhttá duođaštit, ahte lea sápmelaš fitnodat
Ohcejohkalaš fitnodatdoalli Petteri Valle dadjá, ahte sertifikáhta lea sutnje ođđa ášši.
– In leat diekkár ášši ovdal oba smiehttange. Miihan leat jo guhká doaibman Sápmelaš fitnodatdoalliid -searvvis, dan bokte iskan ovddidit sámi mátkeealáhusa.
Valle váillaha eambo dieđu das, ahte mii sámemátkeealáhusa sertifikáhta ulbmil lea ja makkár jurdda sámedikkis lea das.
– Ferten dan beassat vehá dutkat eambo.
Son goittot jurddaša, ahte lea buorre jus livčče mii nu mainna čujuhit ahte vuovdá iežas sápmelaš fitnodahkan. Vaikko dadjáge, ahte ieš gal ii vealttekeahttá dárbbaš dakkára.
– Sáhttá duođaštit, ahte lea sápmelaš fitnodat. Miihan gal leat jo dovddus sápmelaš bearrašin. Guhká bargan dan ovdii, ahte min dovdet, muitala Valle.
Son sávvá, ahte sertifikáhtas sáhtášii leat eambo ávki earáide.
– Orrot leamen dán áigái nu olu earálagan sertifikáhtat, orru muhtimin ahte olmmoš láhppo daid sertifikáhtaid sisa. Sáhttá leat buorre ja doaivvon, ahte lea buorre ja ovdánivčče.
Dán vahkus lágidit Sámekulturguovddáš Sajosis Eurohpa eamiálbmotmátkeealáhuskonfereanssa. Kirsi Suomi doallá konfereanssas gaskavahku sáhkavuoru sámemátkeealáhussertifiseremis Suomas.
