Anarist mađhâšemsyergi stuárrum tiättoo meiddei škovlâmaailmist, ko kuávlun värrejeh ain eenâb olgoeennâmliih perruuh.
Aanaar škoovlâin viereskielâlij párnái meeri lii lasanâm. Tondet ličij tárbu toohâđ pisovâžžân máttááttâs, mii ráhtádât viereskielâlijd párnáid vuáđumáttááttâsân. Párnááh, kiäh iä määti sämi- teikkâ suomâkielâ, algâtteh škoovlâ vuájumáin kielâtáiđoid táválávt oovtâ ive verd.
Avveel škoovlâ rehtor Pirkko Olli muštâl, ete ráhtádâttee máttááttâs luokamáttáátteijee virge lii šoddâm pisovâžžân taan ive. Meiddei Aanaar škoovlân oceh paargon meriáigásâš máttáátteijee siämmáálágán paargon.
Avveel já Aanaar škoovlâst muštâluvvoo, ete viereskielâliih perruuh puátih kieldân pargoi maajeeld.
– Taah vaanhimeh láá kale táválávt puáttám pargo maajeeld, mutâ láá-uv toh eidu taah mađhâšempargoh, tast jiem lah vises. Kalehân maaŋgah párnááh oroh Suáluičielgi kuávlust, te tondiet puávtáččij tom vuáđuld jurdâččiđ, ete tobbeen láá toh mađhâšempargoh, iätá Pirkko Olli.
Meiddei Aanaar škoovlâ rehtor Marja Seilonen muštâl, ete perrui vaanhimeh láá puáttám kuávlun mađhâšemsyergi pargoi maajeeld. Párnááh kiäh uásálisteh ráhtádâttee já suomâ nubben kielân máttááttâsân, iä lah meendu ennuv.
Anarân já Avelân huksejum uđđâ škoovlâi vuáváámist láá ráhtádâttâm toos, ete tárbu stuárráb soojijd puátá fakkist.
– Párnááh šaddeh ucceeb, mutâ tilehân sáttá muttuđ jotelávt-uv mađhâšem já enâmânvarrim tiet. Neljihááh láá kompakteh, mutâ uđđâ škovlârákánâs sundáttâlmist láá annaam huolâ tast, ete soojijd lii máhđulâš vijđediđ, iätá Seilonen.
Arâšoddâdmist olgoeennâmlij párnái meeri meiddei lasanâm
Aanaar peivitipšoin láá ain eenâb párnááh, kiäi tuávááš lii olgoenâmijn, muštâl arâšoddâdemhovdâ Pirkko Saarela.
– Kale arâšoddâdmist lii uáinimnáál olgoeennâmlij perrui lasanem, eromâšávt majemui viiđâ ive ääigi.
Saarela mield iänááš olgoenâmijn puáttám perrui párnááh láá vuárupeivitipšoost seesoong ääigi, mutâ aainâs-uv Avelist já Suáluičielgist meiddei pisovávt.
– Masa jyehi peivitipšojuávhust láá párnááh, kiäh sárnuh aainâs-uv kyevti teikkâ kuulmâ kielâ päähist.
Saarela iätá, ete uđđâ pargei rekrytistmist eŋgâlâskielâtáiđu kiäččoo hiättun. Perrui já peivitipšo koskâsâš savâstâllâm tábáhtuvá šleđgâpoostâ já Whatsapp peht enâmustáá eŋgâlâskielân.
