Stáhtaráđđi lea áddán otne ásahusa boahtte geassái Deanu oalgejogaid bivdui. Dan mielde oalgejogain oažžu oaggut 3 jándora ja goddit ovtta luosa.
Deanu guolledoalloguovllu ságadoalli Mika Aikio illuda stáhtaráđi ásahusas.
– Leahan dat buorre vaikko evttoheimmetge ahte livčče ožžon eanetge bivdit. Muhto olbmot leat hirbmat duđavaččat go besset goittotge ova ovttage guoli goddit.
Aikio goittotge mieđiha, ahte Deanus lea heajos luossadilli.
– Maid lean oaidnán dutkanbohtosiid de gal dat lea rašes dilis go mannan gease ledje unnán dittit. Doaivvu miel dát geassi lea buoret go mannan geassi.
Deanu oalgejogain luosa bivdoáigi álgá 1.7.2025 diibmu 19 ja nohká 4.7.2025 diibmu 19. Luosa oažžu bivdit stákkuin, firpmiin ja boađuin.
Eará guliid oažžu bivdit firpmiin 20.5.–20.6. ja stákkuin 1.6.–31.8.
Mearrádus boahtá fápmui geassemánu vuosttas beaivve.
Maiddái diibmá besse dihto eavttuiguin bivdit Ohcejogas ja dan lassin Veahčajogas moadde jándora. Ovdamearkan stuorra luosaid galggai luoitit ruovttoluotta johkii.
