Taan kiiđâ pajeuáppee aanaarlâš Ainomaija Mäenpää lii uážžum almugijkoskâsii Young Women in Leadership -stiipeend.
Sun illood tubdâstâsâst, mii lâi olâttâs sunjin.
– Jiem lam vuárdám tággáár palhâšume. Kale mun lam tääl hirmâd ilolâš, et tot poođij munjin, Mäenpää iätá.
Sun palhâšuvvoo nuorâi kuáskulâšvuođâ já oovtâviärdásâšvuođâ oovdedmist. Mäenpää lii puáhtám uáinusân ruokkâdávt vädis-uv fáádáid, ovdâmerkkân mánusâškievhivuođâ já suhâpelsensitivlâš máttááttâs. Sun lâi mieldi orniimin meid Aanaar vuossâmuu Pride-tábáhtus.
Sun lii saavâjođetteijen Aanaar nuorâistiivrâst já fáárust meid Laapi pyereestvaijeemkuávlu nuorâistiivrâst. Kieldâvaljâiävtukkâssân-uv sun riemâi vâi nuoráid ličij kiinii jieijâs ahasâš muulsâiähtu já nuorah-uv movtáskiččii jienâstiđ.
Zonta International mieđeet palhâšume jyehi ive 37 nuorâ nisonân, kiäh vaigutteh ohtsâškodálávt jieškote-uv soojijn maailmist. Palhâšume lii 5000 USA dollarid ađai masa 4500 eurod. Listo puoh palhâšum nisonijn kávnoo tääbbin.
– Mun irâttâm aainâs-uv šeštiđ tom puátteevuođâ várás, mutâ kal mun vissâ kiävtám meid tääl keesi ääigi já váhá reissuhommáid, nuorâ arvâl.
Mäenpää lii vuosmuš stipendijn palhâšum sämmilâš
Stipendtoimâkodde lijkkui toos maht Mäenpää lii čonâsâm ucceeblovokielâ já nuorâi vuoigâdvuođâi oovdedmân.
– Sun lii eromâš ovdâmerkkâ puátteevuođâ jođetteijest, muštâl stipendtoimâkode saavâjođetteijee Carita Rönnqvist.
Rönnqvist mield Mäenpää lii vuosmuš sämmilâš, kote palhâšume uážžu.
Aanaarlâš Mäenpää sárnu anarâškielâ já uážui meid Sämitige stiipeend ovdánâm kielâuápuin.
Pajeuáppeečallui maŋa sun lii porgâm anarâškielâ kielâpiervâlist, kost sun áigu juátkiđ meid puáttee ive oppâsopâmuššáin. Meid vaiguttempargo sun áigu juátkiđ.
– Kale tot lii tehálâš munjin, ete mun uážum kevttiđ muu jienâ aašijn, moh láá munjin tergâdeh.
