Sámemusea Siida lea ožžon Suoma kulturruhtarájus 850 000 euro doarjaga Ellos min árbi! -fidnui. Dat lea golmma jahkásaš fidnu, man olis dutket ja ovddidit sápmelaš vuogi gieđahallat dološ sámedávviriid máhcaheami.
– Mii leat hui ilus, ahte leat ožžon Kulturruhtarájus dákkár prošeaktaruhtadeami. Mii áigut rahčat dan ovdii, ahte lasi sámedávvirat máhccet ruoktot Eurohpa museain, dadjá museahoavda Taina Máret Pieski.
Pieski muitala, ahte fitnu ulbmilin lea almmustahttit dieđu ja dutkanbohtosiid, maid sáhttá geavahit ávkin earáge eamiálbmotmuseain. Loahppaboađusin áigot ráhkadit johttičájáhusa, dieđálaš artihkkaliid, rávagirjji, podcast-ráiddu ja vel riikkaidgaskasaš repatriašuvdnakonfereanssa.
Suoma kulturruhtaráju beaivválašjođiheaddji Susanna Petterson dadjá, ahte Sámemusea Siida dahká hui erenomáš barggu ja sii hálidit doarjut dan.
– Siidda fidnu lea museasuorggis mearkkašahtti, go das huksejit ođđa metoda mo meannudit máhcahuvvon dávviriiguin, ja dan sáhttá geavahit maid eará eamiálbmogiid čoakkáldagaid oktavuođas.
Eurohpa museain leat ain duháhiid mielde sámedávvirat, maid hálidit Sápmái
Sámiid kulturárbbi leat čoaggán jo 1600-logu rájes Eurohpa museaide ja dutkanlágádusaide. Sullii 50 000 sámedávvira leat ain Eurohpa museaid hálddus.
Siida-musea lea logemat jagi áigge ožžon olu sámedávviriid máhcahemiid iešguđet museain. Ovdamearkan jagis 2016 Hämeenlinna gávpotmusea skeŋkii sámedávvirčoakkáldagas Sámemusea Siidii ja jagis 2021 fas Suoma Álbmotmusea sámečoakkáldat máhcai Sápmái.
Álbmoga várás leat ordnen deaivvademiid, gos olbmot leat beassan oaidnit máhcahuvvon dávviriid. Dat leat boktán máŋggalágan dovdduid, muitala Pieski.
– Álo ii dieđe mii dat dovdu lea, leago dat illu, moraš vai buot dat oktanaga. Leamaš somá fuomášit, ahte man ollusat leamašan beroštuvvan oahpásmuvvat dávviriidda ja oahppat dain.
Sámemusea Siiddas leat jođus ain ráđđádallamat máŋggain Eurohpa museain sámedávviriid máhcaheamis.
– Doaivvu miel ráđđádallamat ovdánit dakkár loahppabohtosii, ahte dávvirat besset ruovttoluotta iežaset olbmuid lusa, gosa dat gullet, dadjá Pieski.
