Sámediggelága vuosttas gieđahallan riikkabeivviid dievasčoahkkimis joatkašuvai otne gaskavahku ja dievasčoahkkin dohkkehii ráđđehusa evttohusa jienaiguin 143–25. Ságastallan áššis gevvojuvvui ikte maŋŋebárgga ja áššái adde badjel 50 sáhkavuoru.
Dievasčoahkkin jienastii ráđđehusa evttohusa ja Petri Honkosa (guovddáš) evttohusa gaskka.
Honkonen lei evttohan, ahte sámediggeláhkaevttohus dohkkehuvvo 1. vuostecealkámuša láganin. Markus Lohi (guovddáš) guottihii Honkosa evttohusa. Honkonen dagai evttohusas ievttá ságastallamis.
Lappi válgabire riikkabeaiáirasiin ráđđehusa evttohusa beales jienastii Kaisa Juuso vuođđosuopmelaččain. Honkosa evttohusa beales fas jienastedje Johanna Ojala-Niemelä (SDB), Mika Riipi (guovddáš), Sara Seppänen (vuođđosuopmelaččat) ja Markus Lohi (guovddáš). Heikki Autto (kokoomus) ii lean mielde čoahkkimis.
Gieđahallama vuođđun lei vuosttas gieđahallamis láhkaevttohusa sisdoalu láhkateaksta. Nuppi gieđahallamis boahtte vahkus mearriduvvo láhkaevttohusa dohkkeheamis dahje hilgumis, nappo dan sisdollui ii sáhte dalle šat váikkuhit.
Sámedikki stivra lea dohkkehan vuođđoláhkaváljagotti nuppástusevttohusaid sámediggeláhkii.
Riikkabeaivvit jienastit ráđđehusa láhkaevttohusas boahtte vahku maŋŋebárgga 17.6.
Sámedikkis vuolgá delegašuvdna čuovvut riikkabeivviid jienasteami
Sámedikki ovddasteaddjit leat maiddái boahtte vahkus Helssegis čuovvumin riikkabeivviid jienasteami. Báikki alde boahtá leat dálá dieđuid mielde olles ságadoallijoavku.
Sámedikki ságadoalli Pirita Näkkäläjärvi gaskkalduhttá eatnivuođaluomus ja lea mielde čuovvumin riikkabeivviid jienasteami ovttas sadjásaš ságadoalli Tuomas Aslak Juusoin ja vuosttas várreságadoalli Leo Aikioin.
Stivrras aŋkke maiddái Asko Länsman vuolgá čuovvut jienasteami, Juuso muitala.
Ođas beaividuvvo.
