Sámediggelága nubbi gieđahallan álggii riikkabeivviid dievasčoahkkimis otne maŋŋebárgga.
Guovddásbellodaga riikkabeaiáirasat Hannu Hoskonen ja Petri Honkonen evttoheigga lága hilguma, ja danin jienastus sámediggelágas sirdašuvvá.
Riikkabeivviid dievasčoahkkin álggii diibmu 14 ja sámediggelága gieđahallan lei áššelisttus nubbin maŋimužžan.
Sámedikki ságadoallijoavku lea Helssegis čuovvumin riikkabeivviid gieđahallama. Suoma Sámedikki ságadoalli Pirita Näkkäläjärvi gaskkalduhtii eadnivuođaluomus ášši gieđahallama dihte.
– Oidnen ahte dát leat nu dehálaš beaivvit ja historjjálaš ášši ahte lea dehálaš ahte lean mielde, lohká Näkkäläjärvi.
Näkkäläjärvi lea optimisttalaš ahte láhkaevttohus manná čađa, vaikko diehtá ahte mii beare sáhttá vel geavvat.
– Ferte vuordit dassážii ahte buot mearrádusat leat dahkkon muhto dál gal orru jo oalle positiiva, eat leat goassige leamašan ná lahka.
Sámediggelágas gevvo otne ságastallan dievasčoahkkimis. Dál go Hoskonen lea dahkan hilgunevttohusa ja Honkonen lea dorjon evttohusa, jienasteapmi sámediggelágas sirdašuvvá duorastahkii.
Riikkabeivviid dievasčoahkkin jienasta áššis duorastaga čoahkkimis mii álgá diibmu 10.
Ođas beaividuvvon 17.6. dii. 19.23 dainna dieđuin, ahte guovddášbellodaga Hannu Hoskonen ja Petri Honkonen evttoheigga lága hilguma. Ovdal dan muitaleimmet, ahte Yle Sámi dieđu mielde muhtun guovddásbellodaga riikkabeaiáirasat áigot evttohit lága hilguma, ja ahte STT dieđu mielde jienasteapmi áššis sirdašuvvá gaskavahkkui.
Divvojuvvon 17.6. dii. 22.17. Riikkabaivviin jienastit lágas duorastaga, ii gaskavahku nugo vuos lei árvalus.
