Čiččâm ihheed tassaaš Hana Kalábová poođij Suomân Oulu ollâopâttâhân. Tšeekist šoddâm Kalábová kiäsuttui mučis já mielâkiddiivâš anarâškielâst já luvâškuođij tom.
Vuávám lâi maccâđ uáppeelonottâllâm maŋa päikkienâmân juátkiđ uápuid, mutâ eellimsunde muttui koronataavdâ keežild.
– Must ij lamaš talle suijâ leđe Tšeekist, ko uápuh lijjii káidusin. Te mun smiettim, et jis mun talle juáđhám taid anarâškielâ uápuid.
Kalábová aasâi ovdil Suomân varrim Tšeeki uáivikaavpugist Prahast. Miljovnkaavpug huušâ saajeest sun halijdij varriđ Sáámán. Kalábová halijdij oppâđ sárnuđ anarâškielâ pyerebeht já varrij Anarân paargon anarâškielâ kielâpiervâlân.
– Kale mun halijdim porgâđ pargoid kieláin. Oro et jis tuše lohá kielâ ollâopâttuvâst, mut ij peesâ kevttiđ tom, te maht tom talle uáppá olmânáál, sun hundâruš.
Oovtâ ive maŋa anarâškieláin sárnum lii sunjin älkkeb, veikkâ algâ lâi lussâd.
”Mondiet tun ubâ sáárnuh anarâškielâ?”
Tšeekist ulmuuh maŋgii imâštâleh, ete mii kielâid anarâškielâ lii já mondiet Kalábová sárnu tom. Tobbeen iä tieđe sämmilijn já sämikielâin jur maiden. Eeči meid imâštâlâi nieidâs valjim varriđ sajan, kost lii koolmâs já ennuv čuoškah.
Motomeh kulttuuršookih-uv sunjin láá šoddâm varrim maŋa. Tšekkist ulmuuh iä laavii ettâđ aašijd njuolgist já Kalábová lii ferttim opâttâllâđ toos.
– Tšeekist láá eenâb tagareh hiärásalmaah, et išedeh kyeddiđ tävirijd já nuuvt. Ko mun algim syemmilijn kandâskipáráin já ettim et lavkkâ lii hirmâd lussâd, te sun västidij, et tiäđust-uv lii ko tobbeen láá potákkeh já mielkki. Mun talle jurdim, et sun ij lijkkuu munjin, ko ij iššeed muu, Kalábová povvust.
Majemuš mätki Tšeekin pajedij murâšlijd tobdoid. Kalábová tuubdâi, et oovdiš päikkieennâm ij lah innig suu päikki. Tääl oro, et loppâeellim päikki lii Suomâst tâi Säämist.
Syeinimáánust ličij äigi vuod pakkađ tävirijd já varriđ maassâd kaavpugân. Sust ij liččii mielâ vyelgiđ Anarist, mutâ pargoh, kandâskippáár, usteveh já kissá vyerdih suu Oulust.
Kalábovást iä lah čielgâ vuáváámeh puátteevuotân. Eidu tääl jurgâleijeepargo kiäsut enâmustáá já sun halijdičij juátkiđ párnáikirje jurgâlem tšeekikielâst anarâškielân.
– Mun tiäđám, maaŋgâin ulmuin lii čielgâ päälgis, mon sij halijdeh väzziđ. Mun váhá tego tuše vandârdâm, sun juurdâš.
Yle Säämi Kesikyessi-rááiđu puoh oosijd puáhtá kuldâliđ Yle Areenast.
