Ohcejogas bajásšaddan Heidi Nuorgam lea bargan ja ássan badjel 20 jagi Espánnjas Madrid gávpogis. Son lea jo hárjánan Mátta-Eurohpá báhkaide, muhto dál doppe leaiku nu olu bivastaga, ahte ii leat leaika. Madrid ii leat rittus nappo mearas ii sáhte ohcat veahki.
Sotnabeaivve go Nuorgam lei mánáidisguin vuojadanáldás, mihttár čájehii 38-39 gráđa lieggasa.
Espánnjas lea nu báhkas, ahte eiseváldditge váruhit das ja ođđasiin maid juohke beaivve muitalit dilis ja muittuhit čázi juhkamis.
– Mii leat birgen, go leat bosonat ja rusttet, mii bossu galbma áimmu, daid ja vuojadanáldá haga livčče gal háittis, muitala Nuorgam.
Goardi báhkas váikkuha Nuorgam árgabeaivái, vaikko leage hárjánan ruovttueatnamis dálkkádahkii. Son viehká astoáiggis ja hárjehusat leat dábálaččat eahkedis. Mannan vahkus jo fuomášii, ahte lea menddo báhkas rahčat ja valáštallat eahkedis.
– Dál mii viehkat iđđes. Ferte ovdal gávcci jo vuolgit. Ovcci áigge beaivi goardá jo nu, ahte ii leat šat somá, govvida Nuorgam.
Eana dego buollán ja olbmot ohcet čoaskása gávpeguovddážiin
Luondu maid gillá. Lea jaŋas ja doppe, gos eai njuoskat eatnama, de visot lea dego ruškadin buollán, muitala Nuorgam.
Gávpogis báhkat oidnojit máŋgga lahkai, go olbmuidege ii leat nu álki gávdnat čoaskkes báikkiid. Gávpeguovddážiin lea áibmomolsun ja danin olbmot joreštit gávppiin.
– Buohkain ii leat áibmomolsun ja danin sii eai leat ruovttus. Dákkár dálkkis sáhttá áŧestit, go ruovttus sáhttá leat badjel 30 gráđa liekkas. Eandaliige jus ássá allin viesus, gosa beaivi báitá olles áigge.
Dát báhkat leat Nuorgam mielas earáláganat go ovdal. Dan duođaštit maiddái olahusat: Sotnabeaivve mihtidedje olahus báhka Espánnja El Granado gávpogis, 46 gráđa lieggasa.
Eurohpá váralaš garra báhkaid sivvan lea áššedovdiid mielas dálkkádatrievdan ja dákkár dálkkit bohtet doppe beare lassánit.
Farga Nuorgam ii dárbbaš bivastuddat, go boahtá bearrašiinnis Sápmái ja loaktá gitta borgemánu beallemuddui.
– Lean čuvvon dálkedieđáhusaid ja mii leat boahtimen Gámasmohkkái. Mii leat ráhkkanan čoaskásiidda, loahpaha Nuorgam.
