Árbevirolaš álgoálbmogiid musihkkafestivála Ijahis idja lágiduvvo fas borgemánus Anáris. Dán jagi eai ordne mánáid ja nuoraidbeaivvi, go dáhpáhussii ii mieđihuvvon sierra mánáidkultuvrra veahkkeruhta dan jáhkái.
Festivála veahkkebuvttadeaddji Aleksi Ahlakorpi lohpida, ahte mánáide ja nuoraide lea lihkká prográmma.
– Mii fertet mánáide ja nuoraide juoga eará prográmma oažžut áigái. Dakkár go dat lea leamašan ovdal, de ii boađe dán jagi, muhto mii eat leat vajálduhttán sin, dadjá Ahlakorpi.
Čieža artistta lea juo almmuhuvvon, muhto lasi bohtet
21. Ijahis idja dollojuvvo borgemánu 15. - 16. beaivve sámekulturguovddáš Sajosis Anára girkosiiddas. Čieža artista leat dál nannen boahtima guovtti beaivásaš festiválii. Bearjadaga čuojahit Karjalasta kolttien maille -joavku, Áššu-joavku, Yungmiqu ja Ella Marie ja lávvardaga čuojahit Kajsa Balto, Hildá Länsman & Tuomas Norvio sihke Mollet-joavku.
Loahpalaš prográmma almmuhit boahtte vahkus
Festiválii leat goit boahtimin vel lasi artisttat ja vejolaččat vel sierra konsearttat.
– Soaitá leat ahte dán jagi boahtá maiddái goit okta diekkár konsearta, mii ii leat min váldolávddis, lasiha Ahlakorpi.
Dáhpáhus almmuha loahpalaš prográmma artisttaid ja siidoprográmma suoidnemánu nuppi vahkus.
Ahlakorpi lohpida buorre festivála, muhto buorre dálkki ii duostta lohpidit.
– Muđui álo bargat dan ovdii, ahte šaddá olles bearraša ja olles soga festivála, son dadjá.
Dáhpáhus striimejuvvo neahtas.
