Maiddái dán geassái sáhtii ohcat Lappi EJB-guovddážis spiehkastatlobiid Detnui oahpahusa ja kulturdáhpáhusaid várás.
Čieža sierra doaibmi ohce dan muhto Lappi EJB-guovddáš lea hilgon visot ohcamušaid.
Lappi EJB-guovddážis spiehkastatlobiid ledje ohcan Sukuseura Bihtožat ry, Duodjesainjárgga maŋisboahttit, Ohcejoga gievrrat ry, Länsman Pekka, Länsman Sisko, Tanssijoen tilan yhteisö ja Saamelaismatkailu ja yrittäjät ry.
Hilgunákkain buktet ovdan, ahte dutkandieđuid vuođul luossanálli lea erenomáš rašes dilis, gitta heajumus, rukses dásis.
Deanu guolledoalloguovlu lea cealkámušastis dadjan, ahte ohcamušat ledje áššálaččat devdojuvvon, ohccojuvvon bivdomearit ledje smávvát, eaige dat livčče áitán Deanu luossanáli.
Spiehkastatlobit oahpahusa ja kulturdáhpáhusaid várás leat dárkkuhuvvon sámiid árbevirolaš bivdovugiid árbedieđu bajásdoallamii ja sirdimii buolvvas nubbái maiddái luossabivdogildosa áigge.
Go bivdá ruoššaluosaid, sáhttá sirdit guolástankultuvrra maŋisboahttiide
Mearrádusas ovdamearkka dihte Lappi EJB-guovddáža mielas ruoššaluosaid sáhttá muhtun muddui bivdit ja gieđahallat seamma vugiiguin go Atlántta luosa. Ruoššaluosaid bivddu oktavuođas sáhttá sirdit guolástankultuvrra maŋisboahttiide. Spiehkastatlobi ohcan olbmot ja doaibmit sáhttet ohcat lobi ruoššaluosaid jávkadanbivdui.
Ákkastallamiin daddjo, ahte sápmelaččaid bivdokultuvrra sáhttet sirdit maŋisboahttiide maiddái dalle, jus bivdet firpmiin eará guliid go luosaid.
Lappi EJB-guovddáža mearrádusain čuožžu, ahte spiehkastatlobiid gieđahaladettiin leat gidden fuomášumi sihke luossanállái, sámiid rivttiide ja báikkálaš árbevieruid ovddideapmái.
Geardde luossanálli lea áitojuvvon, de Lappi EJB-guovddáža mielas sáhttet ráddjet sápmelaččaid bivdorivttiid vai sihkkarastet luossanáli. Ákkastallamiin čállet, ahte luossadilli lea dál nu heitot, ahte smávitge bivdduin sáhttet leat stuorra váikkuhusat luossanállái.
Jo loahppagiđa árvaledje, ahte spiehkastatlobiid eai mieđit, go luossanáli dilli lea maiddái dán gease rašši. Mearrádusain sáhttá váidit Davvi-Suoma Hálddahusriektái.
Diibmá spiehkastatlobiin ožžo bivdit badjel 50 luosa, muhto daid eai goddán go gávcci. Muhtin bivdojoavkkut eai mannan geasi bivdán ollenge, vaikko livčče lean lohpi.
