Go dáid sániid muhtun sápmelažžii logašii, sihkkarit seammás boađášii šuokŋa millii:
”Muittán ovtta geasseija geavgŋá vuolde fal. Mun oidnen ovtta guorbmebiilla. Mun bealggi loktejin, ja fáru jerren sus. Fáru vulos buoret málbmái.”
Odne bearjadaga bessege Gáregasnjárggas ovtta jitnii lávlut ovdamearkka dihte Veijo Länsman rohki lávlagiid.
Musihkkár Terje Tretnes lávlluhii olbmuid ja lávlagat ledje dakkárat, maid sihkkarit eatnašat máhttet lávlungihppagiid hagage, giiba ii Deatnogátte nuoraid lávlagiid muittášii olggul.
Nilla Pieski goit máhttá visot dieid olggul ja boares sámi lávlagat mearkkašit sutnje olu.
– Dat lei mielahis somá. Justa dákkár dološ lávlagat, maid lean hárjánan jo mánnávuođa rájes lávlut, leat mu váimmu lahka, muitala Pieski.
Áillohačča Váimmustan lea biegga -lávlla lea buot ráhkkásamos lávlla Pieskii ja dan beasai bearjadaga lávlut.
Diimmu lávluma maŋŋá Pieski čoddagis dovdogođii ja jietna jávkagođii, muhto dákkár dáhpáhusa son háliida vásihit boahttevuođasge.
Katariina Guttorm mielas lei buorre jurdda ordnet dákkár dáhpáhusa.
– Galggašii vehá eambo márkanastit, ahte Norggabealde maid boađášedje olbmot.
Ordnejeaddji duđavaš vaikko lei sávvat eanet olbmuid
Ovttas lávlun gulai Ohcejohka Šearrá -kulturvahku dáhpáhusaide. Allsång på Gáregasnjárga -dáhpáhusa lágideaddji Suvi Niittyvuopio viegadii mikrofovnnain lávlluheamen olbmuid ja dáhpáhusa maŋŋá gesii moji.
Son muitala, ahte jurdda ovttas lávlumii bođii jahki dassái. Etniidbeaivvedoaluid oktavuođas lávlo ovtta lávlaga ovttas ja dan maŋŋá olbmot bohte muitalit man somá dat lei.
– Mun fuomášin, ahte olbmot háliidit searvat mielde, eaige álo dušše guldalit.
Niittyvuopio sávvá, ahte ovttas lávlumis boađášii Gáregasnjárgii árbevirolaš geassedáhpáhus.
– Lean hui duđavaš. Álohan sáhttá sávvat eambo olbmuid, eai buohkat álo beasa muhto lean hui duđavaš, dadjá Niittyvuopio.
