Yle muitalii bearjadaga Lappi buresveadjinguovllu diehtosuođđamis, mas 64 áššehasa dieđut ledje suođđan olggobeal olbmuide. Ođđasa almmustahttima maŋŋá Ylei válddii oktavuođa olmmoš, guhte lei ođđajagimánus fidnen šleađgaboasttain amas olbmo buohccevuođaluomu duođaštusa Eanodaga dearvvasvuođaguovddážis.
Šleađgaboasta ii lean suddjejuvvon ja duođaštus lei laktojuvvon dábálaš PDF-čuovusin. Ylei oktavuođa váldán olmmoš ii lean rahpan čuvvosa, go fuomášii ahte dat ii gula sutnje.
Olmmoš válddii dattege oktavuođa Eanodaga dearvvasvuođaguovddážii ja jearai, manin duođaštusa eai lean sádden suddjejuvvon šleađgaboasttain. Dearvvasvuođaguovddážis vástidedje, ahte suddjejuvvon šleađgaboasttaid sádden lea váttis danin go áššehasat eai álo beasa lohkat daid. Yle lea oaidnán šleađgaboastaságastallama.
Lappi buresveadjinguovlu sáddii jonssoha maŋŋá reivve olbmuide, geaidda diehtosuođđan lei čuohcan. Reivves muitaluvvui ahte sin priváhta dieđut dego namma, persovdnanummir ja galledandieđut ledje suođđan olggobeal olbmuide.
Sivvan lohket olbmo ja rehkečállinvuogádaga meattáhusaid
Lappi buresveadjinguovllus muitaluvvo, ahte diehtosuođđan geavai 9.6. Buresveadjinguovllu dieđuid mielde diehtosuođđama sivvan ledje rehketčállinvuogádaga teknihkalaš iešvuođat ja olmmošlaš meattáhus.
Rehketčállinvuogádaga iešvuođaid eai dovdan doarvái bures ja juo šluhttejuvvon rehkegiid čuvvosat báhce gitta ođđa rehketnummiriidda nappo eará áššehasaid rehkegiidda.
Áššehas, gean Yle jearahalai, lohká dahkan áššis rihkusalmmuhusa gaskavahku.
Lappi buresveadjinguovlu ii lean dán rádjai gullan suođđan persovnadieđuid boasttogeavahemiin.
Lappi buresveadjinguovlu šálloša dili
Lappi buresveadjinguovllu diehtostivrenvástideaddji Eija Kivekäs ii lean ovdal gullan Eanodagas dáhpáhuvvan diehtosuođđamis ja son šálloša dáhpáhusa.
Kivekäs lohká almmolaš dásis, ahte dearvvasvuođaguovddáža doaibma ii čuovo Lappi buresveadjinguovllu njuolggadusaid. Son muitala, ahte olbmot skuvlejuvvojit diehtostivrema áššiin.
– Mii deattuhat fuolalašvuođa, go gieđahallat dieđuid, dadjá Kivekäs.
Buresveadjinguovllu dieđuide guoskevaš hálddahushoavda Mikko Päkkilä lohká rávan leat, ahte sii eai sádde olbmuide dieđuid suddjekeahtes šleađgaboasttain, jus dain leat áššehasa persovdna- dahje dearvvasvuođadieđut.
