Ohcejohka šearrá kulturfestivála čohkkii fas olbmui Deatnogáddái Gieddemiellái lávvardaga 5.7. návddašit musihkas ja eará lávdedáidagis. Dáhpáhus lágiduvvui dál juo njealját háve.
Ohcejoga gieldda astoáiggečálli Kaisa Tapiola-Länsman dáhpáhusa ordemat lihkostuvve bures.
Festivála lea sturron jagis jahkái ja Tapiola-Länsman árvala, ahte maŋimuš artistta áigge guossit ledje badjel 400 báikki alde.
– Dat manai hui bures. Olbmot ledje movttegat ja Gieddemiellihan lea máilmmi čábbasamos báiki doallat dákkár kulturdáhpáhusaid.
Lávvardaga váldokonsearttas loaiddastedje Ella Marie, Laura Tapiola, Lávre, Petra Laiti, Sámi jienat ja Semen Bolshunov.
Gielddasápmelaš Semen Bolshunov lei okta konseartta artisttain. Son lea dál vuosttas háve mielde Ohcejohka šearrás. Son lohká ahte Ohcejohka lea sutne dego nubbi ruoktu.
Bolshunov lea ássan logi jagi Suoma bealde Suoločielggis. Son ovdanbuvttii čottalávluma.
– Mus lea hui ollu eambbo maid mun sáhtášin čájehit. Mis lea gildinsámiin hui ollu luvvjt ja mun dárbbašan oahppat eambbo. Dábálaččat lean lávlon turistasafariin, čaimmiha son.
Aslak Pieski beasai gullat iežas luođi konsearttas, go Laura Tapiola juoiggai su.
– Dat lea dieđusge álo stuorra gudni jus iežas birra lea luohti. Lei somá gullat, ja go Laura lea vel mu fuolkenieida, Pieski lohká.
