Buokčaleaddji gávnnai sotnabeaivve bávkkanasaid čázi vuolde lahka Deanu rastábuođu, muitala NRK Sápmi. Buođđu lea lahka Sieiddá gili ja dan ulbmilin lea eastit ruoššaluosaid goargŋumis Detnui.
– Buokčaleaddji gávnnai golbma ášši lahka buođu. Dat sulastahtte boares granáhtaid, muitala Roar Sandodden Norgga Šibitdoavttirinstituhtas. Sii stivrejit ja bajásdollet buođu.
Bolesa operatiivvalaš guovddážii bođii maid diehtu, ahte buođu ledje áitán bombbain, muhto das ii leat sáhka, dadjá Øyvind Holsbrekken Finnmárkku bolesis. Bolesat leat dutkan ášši ja gávnnahan, ahte sáhka lea nuppi máilmmisoađi áigásaš bávkkanasain.
Daid jávkadeapmi lea Norgga suodjalusa ovddasvástádus ja boles lea bivdán sin dahkat dan.
– Dassážii fertet árvvoštallat, sáhttágo guovllus bargat vai fertego vuordit ahte suodjalus lea čorgen báikki.
Báikki birra lea biddjon dorvoguovlu. Dilli lea Sandodden mielas unohas, go sii leat muđuige maŋŋonan áigetávvalis. Deatnu lea stuorra ja govda johka ja olu rusttegiid galggašii oažžut johtui.
-Eat duostta mannat guvlui, eatge bargga doppe ovdalgo leat ožžon čilgehusa, dadjá Sandodden.
Roar Sandodden Norgga Šibitdoavttirinstituhtas muitalii maŋŋelabbos vuossárgga, ahte Norgga suodjalus ii leat fuolas.
– Suodjalus háliida min váldit govaid daid bávkkanasain. Jus daidda eai guoskka, dahje bargga áibbas lahka daid, suodjalus ii leat fuolas, dadjá Sandodden NRK Sápmái.
Lasihuvvon dieđut Norgga suodjalusa vástádusas Sandoddenii 7.7.2025 diibmu 16.10.
