Ijahis idja -festiválas lágiduvvo dán jagi Taleantalávdi, man bokte ođđa Sámi artisttat besset ovdanbuktit musihkaset.
– Taleantalávdi lea min sámeartisttaid iežas lávdi, gos sii besset ovdanbuktit iežaset musihka ja dáidaga, ja ožžot vejolašvuođa leat oidnosis sámi álbmogii, muitala Taleantalávddi buvttadeaddji Ánne-Sofe Niittyvuopio.
Taleantalávdi lea ordnejuvvon ovdalge dan hámis, ahte lágideaddjit leat ieža ohcan dohko artisttaid. Dán jagiges artisttat sáhttet almmuhit iežaset mielde rabas ohcaman bokte.
Lágideaddjit leat jo fidnen muhtin almmuhemiid, muhto lávddi alde ain lea sadji ođđa artisttaide.
– Mii ohcat buotlágan ja -ahkásaš artisttaid. Mii válljet artisttaid dan vuođul, ahte ovdanbuktin šattašii nu máŋggabealat go vejolaš, ahte sii ovddastit sierra genreid ja agiid, ja maiddái boahttevuođas lea vejolaš beassat mielde.
Taleantalávddis sáhttá ovdanbuktit buot musihkkašlájaid.
– Sávan ahte olbmot ohcet dál. Dat lea áidnalunddot vejolašvuohta beassat vásihit festivála, dadjá Niittyvuopio.
Taleantalávddi konsearta lágiduvvo lávvardaga 16.8. diibmu 16.30 Sámekulturguovddáš Sajosis.
Almmuheapmi Taleantalávdái nohká suoidnemánu 16. beaivve. Loga rávvagiid Ijahis ija neahttasiiddus.
