Meccipuáluh já vaibâm vandârdeijeeh láá porgâttâm Laapi kááijumlágádâs moonnâm oho ääigi. Maaŋgah vandârdeijeeh láá silloom miäcán paakâi keežild já kááijum láá tarbâšâm maaŋgah ulmuuh masa piäiválávt. Majemuš tábáhtus lâi Ucjuv kuávlust.
– Vaibâm vandârdeijeeh láá lamaš Urho Kekkonen aalmuglâšmeecist já Kietâruottâsist ovtâskâs tábáhtusah. Vandârdeijeeh láá vaarâ árvuštâllâm navcâidis puástud ja vaibâm talle paakâin. Taid láá talle viežžâm meddâl, muštâl kááijumhovdâ Harri Paldanius.
Meccipuáluh láá lamaš pirrâ Laapi eennâmkode meid aaibâs tavveen. Äijihšoŋŋâ lii iänááš suijân puáloid, mutâ meid ulmui tulâstâllâm lii tovâttâm taid.
Majemui peeivij pyelimeh láá lamaš iänááš Maadâ- já Nuorttâ-Laapist. Stuárráámuuh puállám kuávluh láá lamaš love hehtaarid.
Paldanius rävvee vandârdeijeid huolâttiđ čääsi juhâmist já avžut peiviv väzziđ uánihub maađhijd. Nuuvtá 112-applikaatio lii pyeri luođiđ puhelimân, já te huolâttiđ et lii tuárvi virde.
– Ucjuuvâst majemuš tábáhtus lâi taggaar, ete puhelimest lâi virde nuuhâm. Mijjân lâi vaigâd finniđ tastoo lasetiäđuid tobbeen, mutâ tot-uv pargo tääl porgui, sun muštâl.
Paldanius muštoot, ete mecci lii koškes meid meccipuáluváruttâs nuuhâm maŋa já tuulâ kieđâvušmist ferttee leđe huolâlâš.
