Maŋimus vahkuid áigge davvin leat šaddan spiehkastat olu oanehis šleađgaboatkkat bajándálkki dihtii. Elrávdnje- ja energiijafitnodat Inergia beaivválaš jođiheaddji Tommi Koskinen šálloša dili. Son ádde ahte dat lea hehtten olbmuid árgaeallima.
– Sihkkarit dat bohciidahttá dovdduid juos mikro diimmu bidjá rivttes áigái logát geardde dahje juos čuovvu njuolggo valáštallansáddaga, de gal dat váivvida olu, son árvala.
Vearrámus dilli leamašan Anára márkanis, gos muhtun áššehasain ledje sotnabeaivve joba guoktelot oanehis šleađgaboatkka jándoris. Šleađggat leat Anáris boatkanaddan jámma bajándálkki áigge guovtte siva geažil.
– Anáris leat jođus elrávdnjefierpmádaga huksenbarggut. Dat veháš lasihit dan, man hearkkit vigit šaddet. Huksenbarggut gárvánit mánotbaji siste ja dálvvi guvlui leat dasto buorre dilis, Koskinen illuda.
Nubbi sivva lea Anára girkosiidda rolla elrávdnjefierpmádagas. Anára girkosiiddas elrávnnji juohkin joatkašuvvá iešguđet guovlluide gildii ja leat guhkes kábelgaskkat. Jus dákkár stoalppuidguin leahki elrávdnjekábeliidda deaivá álddagas, nu dat sáhttá váikkuhit maid Anáris.
Koskinen muittuha, ahte oanehis boatkkat leat dárbbašlaččat, go dat suddjejit stuorát vahágiid ja guhkit boatkkain.
Son muituha maiddái, ahte áššehasaid šleađgarusttegat fertejit gierdat elrávdnjefierpmádaga normála gealdduid molsašuddama ja šleađgaboatkkaid. Hearkkes biergasiiguin Koskinen ávžžuha geavahit UPS-sihkkarastima ja badjegealddosuoji (su. ylijännitesuoja).
