Aanaarlâš Pessi Koskinen, 22, uáivi ij keesâš ollâgâsâst. Sun lii álgám njuškiistâllâđ kirdemmašinist siäivumpurjâsáin.
Koskinen oovtâst skipárijnis láin sierâdâm jurduin, et kolgâččij-uv motomin njuškiđ siäivumpurjâsáin. Skippáár piejâi-uv tijmá tiäđu, et tääl sun lii almottâttâm jieijâs siäivumpurjâsnjuškimkuursân.
– Na tääl ij äävti muidego, et mun koolgâm meiddei. Maavsij 500 eurod já toos kullui käävci njuškim. Tast tot aalgij.
Vuosmuu keerdi, ko poođij äigi njuškiđ vuálus kirdemmašinist, ij Koskinen poollâm. Njuškimškovliittâs lâi nuuvt pyeri, et ij tarbâšâm. Sun mieđeet, et čuávuváin keerdijn sun lii lamaš eenâb jiärástum. Ohtii taan keesi-uv suu puoh ryevjih tuárgistii jo ton muddoost, ko sun lâi kuárŋumin kirdemmašinân.
”Tot lii tot adrenaliin, mii tast šadda”
Pessi Koskinen lii meddâl Anarist, mut áásá tääl Oulust. Njuškiistâllâm siäivumpurjâsáin aalgij meid Oulust.
Veikkâ siäivumpurjâsnjuškim lii sunjin uđđâ puđâldâs, lii sun taan räi kiergânâm njuškiđ mašinist vuálus jo 42 kerdid. Veikkâ njuškiimeh láá jo melgâdávt, te Koskinen mielâst jyehi njuškim lii ereslágán. Tot lii meid ohtân suijân toos, mondiet tot kiäsut.
– Tot lii tot adrenaliin, mii tast šadda. Tast láá nuuvt ennuv uđđâ ääših, moh ubâ ääigi puátih. Já tot áimuvirde mii lii, ko kačča suullân 200 kilomeetter tijmeliävttoin. Toh láá nuuvt uccâ lihâstâsah, maid kalga porgâđ, te njuškimčođâldâs sáttá älkkest moonnâđ aaibâs hiloi haloi.
Koskinen nannee, et siäivumpurjâsáin njuškim ij lah kuittâg varâlâš, ko mana ravvui mield já tiätá jieijâs tááiđui raajijd.
Koččâm lasseen kiäsuttij kaččâm
Moonnâm keesi uđđâ njuškimpuđâldâs lasseen Koskinen keksij meid kaččâđ maraton ađai pajeláhháá 42 kilomeetter kaččâm. Sun ij ubâ mušte, kost juurdâ poođij.
– Oovtâ peeivi mun algim kaččâđ já 3–4 mánuppaje mun jyehi peeivi kaččim suullân 5–20 kilomeetterid.
Keesi loopâst sust lâi tärhis kaččâmohjelm, mon sun čuávui. Loppâkeesi sun talle čođâlditij maratonkaččâm.
– Tom maŋa mun jiem lah kaččâm oovtâgin meetter, et tot lâi taggaar keesi.
