Suoma ruhtaministeriija áigu evttohit čuohte miljovnna euro lassečuohppamiid sosiála- ja dearvvasvuođaservviid stáhtadoarjagiidda. Ráđđehus mearridii jo árat 140 miljovnna euro čuohppamiin.
Evttohuvvon lassečuohppamat váikkuhivčče maiddái sápmelaččaid sosiála- ja dearvvasvuođasearvi SámiSosterii.
– Mis leat dál gávcci bargi sosiála- ja dearvvašvuođaministeriija ruđaiguin. Dat mearkkašivččii dieđusge, ahte sihkkarit guokte bargi bázáše dasto, jus ollašuvvet dat stáhtaministeriija evttohusat, muitala searvvi doaimmajođiheaddji Ristenrauna Magga.
Magga lea fuolas daid olbmuid beales geat ožžot ja dárbbašit veahki, eandalii doaresbeale giliid vuorrasut olbmot. Earret eará searvvi Birgen ruovttus -prošeakta lea oaivvilduvvon vuorrasut olbmuid buresbirgejumi nannemii. Doibmii gullá muhtun báikkiin maiddái eaktodáhtolaš ruoktogalledanbargu.
– Eanet ja eanet oidnojit ja leat boares olbmot ruovttuin ja goittotge dat bálvalanviesut leat jo dievva ja dohko šaddá vuordit. Seamma áigge buresbirgenguovllut šaddet iežaset doaimmaid gáržžidit.
Sávvet gullat sámiid jurdagiid searvvi doaimmaid boahttevuođas
Ristenrauna Magga lea nammaduvvon stáhtaráđi ráđđádallangoddái, gos leat servviid ja eiseválddiid ovddasteaddjit. Ráđđádallangottis smiehtadit earret eará dan, makkár doaimmaid ii sáhte gáržžidit.
Dál searvvi stivra áigu deaivvadit bargiiguin ja sámiiguin iešguđege guovlluin, gos searvi doaibmá. Sávaldahkan livčče gullat olbmuid jurdagiid SámiSostera doaimmaid boahttevuođas.
Searvi lágiida ságastallandilálašvuođaid Anáris, Heahtás ja Vuohčus. Vuosttaš deaivvadeapmi lea Anáris duorastaga, borgemánu 14. beaivve.
Magga muitala, ahte eiseválddit váldet vuhtii servviid iežaset evttohan gáržžidemiid. Danin das lea stuorra mearkkašupmi, makkár doaimmaid searvvi stivra mearrida joatkit.
– Gáržžideamit gal bohtet, muhto fertet fal sávvat ja bargat dan ovdii ahte eai goitge livčče nu olu.
Magga háliida muittuhit, ahte sámiin lea Suomas dušše okta sosiála- ja dearvvasvuođa searvi, mii lea guhká rahčan sámiid ja sámegielat sode-bálvalusaid ovdii.
– Mun gal sávan, ahte buohkat geain leat bellodatoktavuođat, nu ehpetgo jo bargga dan ovdii.
