Njeäʹllem-Keväjääuʹr da Njauddâm vuuʹdi saaʹmi siidsåbbar norrâʹtte sueʹvet 27.9.2025 vuõssvuâra õhttsaž såbbra Aanra ǩiõttʼtõõllâd jõnn linjjeemaaʹššin, mâʹte kueʹllǩeâmppooccmõõžži miõttmõõžž vuâđđjurddjin da tän čõõuč mainnsin joorrâm koltta-sääʹn âânnmõõžžâst.
Saaʹmi ouddooumaž Veikko Feodoroff mušttal, što tät lij saaʹmi siidsåbbri historiast vuõssmõs õhttsaž siidsååbbar, koʹst saǥstõõlât jõnn õhttsaž aaʹššin.
– Lie jõnn linjjeemääʹšš puättam ouʹdde: kueʹllǩeâmppääʹšš, što ǩeäid nåkkmid vuäitt uʹvdded da jeeʹres prinsiippid. Tõt lij jõnn äʹšš, koon pirr saǥstõʹlleš tälvva siidsåbbrin da tõõzz âlgg õinn lââʹzz valmštõõllâd. Tõʹnt tuʹmmjim sääʹmsuåvtõõzzin norrõõttâd õõutsâjja, mušttal Feodoroff.
Såbbar såbbrõõžžât Aanar ceerkavsiidâst jååʹttemõhttvuõđi diõtt, ko kuhttuiuuʹdin lij seämma mäʹtǩǩ pääiʹǩ ool.
Tän pâiʹlmeärrsaž siidsåbbrest lij mieʹrren še saǥstõõllâd õõutsââʹjest lääʹddǩiõllsaž koltta-sääʹn âânnmõõžžâst. Saǥstõõllmõš vuõʹlji jottu säʹmmlai tuõttvuõtt- da suåvâdvuõttkomissio komissaar Irja Jefremooff eʹtǩǩõõzz vuâđald. Jefremoff kõõjji, õõlǥči-a jõskkâd ââʹnnmest lääʹddǩiõllsaž koltta-sääʹn. Son säärnai, što ääʹššest âlgg saǥstõõllâd sääʹmõutstõõzz seʹst.
Ouddooumaž vuäinn, što Jefremooff eʹtǩǩõs lij miârkkteei äʹšš, koozz âlgg vuäǯǯad sääʹm-meer õhttsaž vuäinalm.
– Tät lij veiddsõs äʹšš, kååʹtt lij jiânnai mainstâttam oummid da lij miõllǩieʹssi äʹšš. Meeʹst leäi siidsååbbar pueʹttmen, nuʹtt sääʹmsuåvtõõzz tuʹmmje, što tõt lij šiõǥǥ päiʹǩǩ siidsåbbrest puʹhtted jõnn, võõrâs ääʹšš mainstemnalla.
Njeäʹllem-Keväjääuʹr da Njauddâm sääʹmvuuʹdin ââʹnet vuuʹdest jälsteei saaʹmi siidsåbbrid uuʹccmõsân õʹhttešt eeʹjjest. Tän lââʹssen taarb mieʹldd vueiʹtet riâššâd še jeeʹres såbbrid. Taarb mieʹldd vueiʹtet riâššâd vuuʹdi õhttsaž siidsåbbar, jõs ǩiõttʼtõõllâmnalla lij sääʹmvuuʹd leʹbe saaʹmid kuõskki veiddsõs leʹbe vuâđđjuurdlaž äʹšš.
Njeäʹllem-Keväjääuʹr da Njauddâm vuuʹdi saaʹmi siidsåbbri õhttsaž såbbar såbbrõõžžât sueʹvet 27.9.2025 čiâss 12.00 ääʹljeeʹl Aanrest Sääʹm škooultemkõõskõõzz Lassikuäʹđest.
