Dál sáhttá ohcat fárrui Sámi stuorámus musihkkadáhpáhussii, Sámi Grand Prix -gilvui. Boahtte jagi gilvu lágiduvvo Guovdageainnus njukčamánu 28. beaivvi.
Gilvalit sáhttá ođđa lávlagiin dahje luđiin nu gohčoduvvon lávlunoasis ja juoiganoasis.
Juoigan- ja lávlungilvu lea sturron jagis jahkái ja dat čohkke oasseváldiid miehtá Sámi. Diibmá lávlunoasi vuittiiga Piera Eira ja MÁIJÁ. Juoiganoasi vuoittu faskkii OSCAAL.
– Midjiide NRK:s lea dehálaš čájehit dan viidodaga, man stuoris Sámi luohte- ja musihkkabiras lea. Mii bovdet sihke ođđa ja sajáiduvvan artisttaid searvat. Sii leat lunddolaš ja dehálaš oassi min máŋggabealálašvuođas maid mii rámis čájehit, dadjá NRK Sámi doaimmahushoavda Norleif Krokmo.
Beaggima lassin artisttat ožžot doarjaga iežaset dáidaga ovdánahttimii
Boahtte giđa šaddá viđat geardi, go NRK sádde Sámi Grand Prix njuolga Báktehárjji hállas, Guovdageainnus. Gilvvu leat beassan maŋimuš jagiid čuovvut maid Ruoŧas ja Suomas.
Dainna lágiin háliidit fállat sámemusihkáriidda alla dási lávddi, mii lokte sámemusihka oidnosii viidát, muitala Krokmo. Stuorra tv-show lassin lea ulbmilin doarjut ja addit reaidduid artisttaide ovdánahttit iežaset dáidaga.
– Min áigumuš lea loktet sámi musihka ja luođi dan čehppodaga bokte, mii min artisttain lea jo. Midjiide mearkkaša ollu, go beassat vásihit juste dan luođi dahje juste dan lávlaga mii addá midjiide dan dovddu, ahte dá lea duođaid stuoris, lohká Sámi musihkkafestivála buvttadeaddji Ol-Johan Gaup.
Almmuheapmi Sámi Grand Prix'ai lea rabas gitta skábmamánu 3. beaivvi rádjai. Almmuhanskovi gávnnat dáppe.
Vaikke Sámi stuorámus lávdái njuiken sáhttá orrut balddihahtti eandatlige easkaálgi musihkkáriidda, de NRK:s ávžžuhit ohcat dahje váldit goit oktavuođa.
– Mii áinnas ságastallat duinna. Mis leat ollu dieđut mat sáhttet leat ávkkálažžan dutnje ja veahkkin viidásit árvvoštallamis, lohká NRK Sámi prošeaktajođiheaddji Ann-Irene Buljo.
