Sämikielâi okko lii álgám onne vuossaargâ. Kielâoho ulmen lii pyerediđ sämikielâi sajattuv já máátu sämikielâin já kulttuurijn.
Suomâ pel Säämist ovdâmerkkân sämikielâi káidusmáttááttâshaahâ uárnee puohháid ávus sämikielâtiijmijd.
– Fáddán lii taan ive argâpeivi, te anarâškielâ tijmeest mij máttááttâllâp škovlâlij argâpeeivi já mii argâpeeivist tábáhtuvá, muštâl haavâ anarâškielâ máttáátteijee Laura Ylinampa.
Sun muštâl, et kii peri puáhtá uásálistiđ ávus oppâtijmijd, ige taarbâš mättiđ sämikielâ ollágin muuneeld.
Anarâškielâ oppâtijme lii majebaargâ iđedist, koskoho lii tavesämikielâ já tuorâstuv nuorttâlâškielâ oppâtijme.
Ylinampan kielâokko meerhâš máhđulâšvuođâ jyehiđ tiäđu sämikielâin ovdâmerkkân máttáátmáin, mut meid máhđulâšvuotân ávudiđ sämikielâ. Sun keččâl jieš-uv kevttiđ kielâ kielâohhoost val eenâb ko táválávt. Ylinampa halijdiččii luuhâđ eenâb fyysisijd kiirjijd sämikielân.
– Taat lii pyeri okko toos, et puávtám talle jieš-uv luuhâđ aaibâs táválijd kiirjijd meiddei.
Kielâoho kunnen maaŋgâlágáneh tábáhtusah
Kielâokko lii jyehi ive ohhoost 43 já oho láá viättám ive 2019 rääjist. Kielâoho ääigi jieškote-uv organisaatioh uárnejeh tábáhtusâid. Suomâ máttááttâsminister Anders Adlercreutz tuáimá taan ive kielâoho suojâleijen.
Kielâoho tábáhtusâid puáhtá uuccâđ ovdâmerkkân kielâoho nettisiijđost. Tábáhtusâid puáhtá kavnâđ meid sosiaallii mediast čoovdâsaanijn #giellavahkku.
Taan ive kielâoho ääigi lii almostum meid uđđâ filmâ Jagi láddelaš. Kielâoho kunnen lii meid toimâtteijee já kirječällee Sara Kelemeny kyessin Ruávinjaargâ kirjeráájust vuossaargâ tijme 17.30. Meiddei kieldah uásálisteh kielâookon, ovdâmerkkân Aanaar kieldâ kielâkähviviäsu uárnee tuorâstuv puohháid ávus káhvástâllâmpuudâ.
