Moonnâm oho loopâst virgeomâhááh, rijjâtátuliih já äššitobdeeh lijjii čokkânâm Suáluičiälgán kááijumpalvâlemseminaarin. Oovtâst hárjuttâllâm jyehi ive lii tehálâš maaŋgâ-uv suujâst.
– Laapi kuávlu jiešvuođah láá, ete tot lii häärviht asâttum, láá kuhes kooskah já pirrâ ive lii viehâ koolmâs. Virgeomâhâšresursij meeri lii räijejum já távjá tarbâšuvvoo meid rijjâtátulâš toorjâ pargoi tipšomist, muštâl Jari Pirnes, Laapi pyereestvaijeemkuávlu vuosâtipšo ovdâsvástádâstuáhtár.
Pirnes uáiná rijjâtátulâš kááijumpalvâlus Vapepa rooli merhâšitten eromâšávt stuárráb tábáhtusâin, ovdâmerkkân poolis jođettem uuccâmpargoin tâi stuorrâ paartijn.
Jis vuosâiše ij lah uážžumnáál, te rijjâtátulij rooli šadda tehálubbon
Laapi pyereestvaijeemkuávlu haldâttâs tuhhiittij moonnâm oho majebaargâ iävtuttâs palvâlemviärmáduv nubástusâin.
Maaŋgah láá huolâstum iävtuttâsâst käržidiđ tuávtirkocceem Avveel tiervâsvuođâkuávdáást. Hammiittâsâst iävtutteh, ete tuávtirkocceem ličij Avelist áávus peiviv, já iho kiddejuuččij. Keevâtlávt tot tárguttičij tom, et sämmilij päikkikuávlu taveoosijn ličij masa 500 kilomeetter mätki pirrâ jándur kocemân Ruávinjaargân.
Äššikirje lii eskin iävtuttâs, já ohtsâšpargokuomijn, čonâsjuávhuin já pyereestvaijeemkuávlu toimâorgaanijn lii máhđulâšvuotâ celkkiđ vuáváámist skammâmáánu 21. peeivi räi. Lopâlii miärádâs ääšist taha Laapi pyereestvaijeemkuávlu kuávlustivrâ.
Pirnes lii persovnlávt tuođâi huolâstum tast, maht vuosâiše kapasiteet rijttáá, jis koccee tipšolágádâsâid kiddejeh. Ambulansohtâduvah láá maaŋgâ tiijmijd meddâl eres pyeccei kiävtust, ko tot vuálgá tuálvuđ pyecceid Ruávinjaargân tâi Oulun.
– Jis ambulansohtâduvah láá kuhháá čonnum tääbbin tavemuu Laapist, te lii viehâ vises et täävjib šaddeh tagareh tileh, et vuosâišeohtâdâh ij lah uážžumnáál. Talle puáhtá jurdâččiđ, et meiddei rijjâtátulâš tuáimei rooli šadda puátteevuođâst tehálubbon, jis návt kiävá.
