Suomâ tavemus jieŋâskiärruservi Tunturi-Kiekko ađai Tu-Ki lii Suomâ jieŋâskiärulito iävtukkâssân ive valastâllâmservin. Jieškote-uv šlaajâi ornijduvah väljejeh iävtukkâsâidis, main raati väljee kulmâ finalist iävtukkâssân valastâllâmgaalan ive valastâllâmservin.
Taan tove ive valastâllâmservin oceh seervi, mii lii huksim ubâ eellim kukkosijd pálgáid já nonnim servitooimâ juksâm, jotkum já merhâšume.
Tunturi-Kiekko tiävdá taan ive valjimkriterijd ovdâmerkkân sii aktiivlâš já maaŋgâpiälálâš tooimâin puoh kuávlu ässeid, agâstâl jieŋâskiärrulito kuávluhovdâ Jari Lempinen.
Tunturi-Kiekko tuáimá Ucjuv já Aanaar kieldâin. Avelân speelâid joteh ránnjákieldâ lasseen meid riijkâraajij rasta Kirkkonjaargâst.
Seervi ulmen lii lihâttiđ ulmuid pärnivuođâ rääjist rävisolmožin nuuvt vijđáht ko máhđulâš.
Jiem osko, ete Suomâst kávnoo nubbe servi, mii tuáimá návt vijđáht.
Sofia Pohjanen, Tu-Ki hárjuttâshovdâ
”Jis haalijd spellâđ, te ferttee jotteeđ”
Tavveen puohah láá hárjánâm mađhâšiđ kuhes kooskâid já meid Tu-Kist spellâmmääđhih láá kuheh. Uánihumos spellâmmätki lii sist 160 kilomeetterid.
– Kooskah láá kuheh já toh iä lah mijjân váddáseh ko mij lep hárjánâm taid. Párnááh já rävisulmuuh-uv iberdeh, ete jis haalijd spellâđ, te ferttee jotteeđ, muštâl Pohjanen.
Suomâ tavemuu jieŋâskiärruseervist láá muáddi spellee ovdánâm kidâ SM-juávhoid räi. Tu-Ki fáálá-uv sierâ valastâllâmhárjuttâs spelleid, kiäi ulmen lii ovdániđ jieŋâskiärust stuárráb kiedijd.
Tego seervijn ain, meid Tuntur-Kiekko toimâm váátá ennuv rijjâtátulij pargo. Saavâjođetteijee mield Aanaar kieldâst rijjâtátuliih láá ain kavnum tábáhtussáid, jieŋâskiärruhárjuttâssáid já eres pargoid. Meid Aanaar kieldâ iššeed seervi tooimâ falâmáin jieŋâskiärruhaali seervi kiävtun nuuvtá.
– Mij lep halijdâm leđe aktiivliih meid tábáhtusuárnejeijen, moh láá meid uássin mii ruuđâskappuumist. Mij keččâlep orniđ stuárráb tábáhtusâid, ovdâmerkkân tijmá lâi Anarist Winter Classic -spellâtábáhtus, muuštâš Pohjanen.
Seervist uáinih ive valastâllâmseervi iävtukkâsvuođâ stuorrâ kunnen já kijttosin ubâ siärván já ton ulmuid.
– Masa čiärádim, tot lâi nuuvt stuorrâ äšši peessâđ iävtukkâssân ko Suomâst láá maaŋgah čyeđeh jieŋâskiärruseervih, te lii tot tuođâi stuorrâ kunnee, muštâl Pohjanen.
