Dovddut bohciidedje duorastaga go Lappi buresveadjinguovlu doalai dieđihandilálašvuođa anárlaččaide ja ohcejohkalaččaide das, mo sii áiggošedje rievdadit dearvvasvuođabálvalusaid vai sestet ruđa.
Plánain lea heaittihit Avvilis doaktára idjagohcinbálvalusa ja boahttevuođas Avvilis oaččošii veahki buohccedivššáriin seaŋgaossodagas.
Buresveadjinguovlu lea dál árvvoštallamin dan, man olu bálvalusaid rievdademiin ožžot ávkki. Avvila idjaáigge doavttirgohcima heaittiheamis ii leat goittotge makkárge seastosupmi vel dieđus, muitalii Lappi buresveadjinguovllu sodeguovddáža hoavda Antti Alaräisänen.
– Váikkuhusaid árvvoštallan lea ain gaskan ja nu lea maiddái ruđalaš váikkuhusaid rehkenastin. Seastit muhtun veardde gohcinbuhtadusain, muhto de bohtet dieđusge eará golut, maid ferte vuhtii váldit, jorahallá Alaräisänen.
Dárkilis loguid váilun earduda olbmuid
Dilálašvuođas roavva árvalussan dadjaluvvui, ahte jus olles Lappis geahpedit eahket- ja idjaáiggiid doavttirgohcimiid, dainna seasttášii sullii bealle miljovnna euro. Dat ii leat virggálaš lohku, baicce dan dušše árvaladde.
Ohcejoga gielddahovdii, Päivi Kontioi bázii bahča miella dilálašvuođa maŋŋá.
– Váivvida, go eai velge addán makkárge loguid. Ja dat logut maid muitaledje, ledje dakkár árvalusat. Orru ártet, ahte vulget johtui almmá albma loguid, dadjá Kontio.
Dilálašvuođas buresveadjinguovllu virgeolbmot árvaledje, ahte Avvilis idjagohcimis doaktára veahki leat dárbbašan okta dahje guokte olbmo ijas. Dilálašvuođas muitaledje ahte boahttevuođas buohccedivššáriidda addet lassiskuvlejumi háviid dikšumis.
Turisttat leat noađuhan Avvila dearvvasvuođaguovddáža olu, muhto buresveadjinguovllu mielde dasa lea boahtimen čoavddus, go Suoločielgái rahpet priváhtta doavttirguovddáža.
Guhkes gaskkain muittuhedje máŋgii
Ássiide oaivvilduvvon dilálašvuođa maŋŋá Sanna Säämänen váillahii ain vástádusaid. Son lea buohccedivššár ja bargosuodjalanáššeolmmoš Anár-Ohcejoga guovllus.
– Gal dáppe leat nu guhkes gaskkat. Jus dáppe heaittihit doavttirgohcima, de das ii leat makkárge dásseárvu, jus veardida máttasuopmelaččaide, dadjá Säämänen.
Ovdamearkka dihte Njuorggámis lea mátki Roavenjárgii 497 kilomehtera ja dan ovdanbukte dilálašvuođas máŋgga njálmmis. Maiddái sápmelaččaid gielalaš rivttiin hálle máŋgasat, dego ovdamearkka dihte Ohcejoga gielddahoavda.
Čogget namaid birrajándora gohcinbálvalusa beales addressii
Anu Avaskari lea guovlostivrra áirras ja son lea álggahan addreassa Avvila idjadoavttirbálvalusa seailluheami buorrin. Namaid čoaggimin son háliida olbmuid oaivila mearrádusaid dahkama veahkkin.
Neahtas addreassa lea čoaggán dán rádjai 7600 nama. Dasa lassin gieđain báhpárá leat vuolláčálán sullii čuođi olbmo.
– Gal mun háliidan jáhkkit, ahte olbmuid oaiviliin lea váikkuhus, sávvá Avaskari.
Eanodagas deivet ássiid boahtte vahkus
Seammalágan dieđihandilálašvuođa dollet maiddái Eanodagas. Eanodaga, Muoná, Gihttela ja Kolari ássiide dilálašvuohta ordnejuvvo 13.11.2025. Dat lea Eanodaga váldostivrasáles. Liŋkkaid dilálašvuođaide gávdná Lappi buresveadjinguovllu neahttasiidduin.
Plána mielde Muoná seaŋgaossodaga áššehasaid áigot sirdit Gihttelii, gos eai leat goassige ovdal fállan sámegielat bálvalusaid. Dál Muonás leat máŋga sámegielat bargi.
